Лінкі ўнівэрсальнага доступу

Апытаньне “Свабоды”: чаму пагаршаюцца дачыненьні з суседзямі?


Альгерд Невяроўскі, Менск Чаму ўзаемадачыненьні Беларусі з большасьцю суседніх краін апошнім часам пагоршыліся? Апытаньне беларускай “Свабоды” на гэтую тэму сярод жыхароў Менску праводзіў наш карэспандэнт.

(Карэспандэнт: ) “Скажэце, чаму, на Вашую думку, пагоршыліся адносіны Беларусі з большасьцю суседніх краінаў?”

(Дзяўчына: ) “Ня ведаю. Відаць, нешта няслушна робім, няправільна жывём”.

(Спадар: ) “Відаць, гэта нашае кіраўніцтва вінаватае”.

(Спадарыня: ) “Вы ведаеце, я вельмі люблю Беларусь. Таму нічога не магу сказаць. І думаю, што ў нас вельмі добрыя адносіны. Я была ва Ўкраіне, і многія знаёмыя казалі, што нашмат лепш жывём, чым яны”.

(Хлопец: ) “У нашай дзяржавы нармальная палітыка. Заўсёды было два цэнтры — былы Савецкі Саюз і Амэрыка. І супрацьстаяньне паходзіць менавіта з Амэрыкі”.

(Пэнсіянэр: ) “Гэта памылка палякаў. Мы заўсёды жылі дружна з палякамі. Увесь час”.

(Кабета: ) “Таму што ў нас вельмі добра — у параўнаньні зь іншымі дзяржавамі. У нас стабільнасьць, у нас лепш за ўсіх”.

(Пэнсіянэр: ) “З розных прычын. Што да Амэрыкі — гэта асобная размова. І што Пуцін цяпер робіць многае адпаведна з палітыкай Лукашэнкі, таксама відавочна. Гэта вельмі вялікая й сур’ёзная размова. Таму так адразу й не адкажаш. Але ў многім залежыць ад таго, што нам не хапае гнуткасьці. У гэтым, мне здаецца, сэнс любой палітыкі”.

(Хлопец: ) “Я думаю, з-за памылковай палітыкі кіраўніцтва Рэспублікі Беларусь: яна не скіраваная на падтрыманьне нармальных адносінаў з краінамі Эўропы і ўсімі суседзямі”.

(Пэнсіянэр: ) “Таму што тут дыктатура”.

(Спадар: ) “Мяне засмучае тое, што ў нас няма на вышэйшым узроўні адносінаў з нашымі суседзямі”.

(Спадарыня: ) “Выглядае на тое, што справа ў нашым “бацьку”.

(Спадарыня: ) “Я думаю, што гэта ж ня мы, шараговыя грамадзяне, вінаватыя. Думаю, перадусім нехта ня можа дамовіцца там, наверсе”.

(Хлопец: ) “Я лічу, што гэта палітыка не Беларусі, а менавіта суседніх з намі краінаў. І ўсё праз тое, што яны не задаволеныя нашай замежнай і ўнутранай палітыкай”.

(Спадарыня: ) “Нашая краіна вельмі адкрытая для ўсіх. Таму заўсёды патрэбныя стасункі зь нейкімі іншымі краінамі. Але наш прэзыдэнт гэтага ня хоча”.
XS
SM
MD
LG