Лінкі ўнівэрсальнага доступу

Актывістаў “Кхмары” асудзілі на 15 сутак арышту за дробнае хуліганства


Алег Грузьдзіловіч, Менск Актывістаў грузінскай моладзевай арганізацыі “Кхмара” Георгія Кандэлакі й Луку Цуладзэ асудзілі на 15 сутак адміністрацыйнага арышту за дробнае хуліганства. Грамадзянаў Грузіі па-ранейшаму ўтрымліваюць у ізалятары на менскай вуліцы Акрэсьціна. Тым часам гучаць розныя вэрсіі адносна таго, чаму грузінскіх актывістаў дагэтуль не дэпартавалі зь Менску.

Прысуд Георгію Кандэлакі і Луку Цуладзэ вынес адміністрацыйны судзьдзя Маскоўскага раёну Менску Віктар Казак. Гэта адбылося сёньня, 29 жніўня. Грамадзяне Грузіі, як паведамілі ў судзе Маскоўскага раёну сталіцы, асуджаныя за дробнае хуліганства. Іх па-ранейшаму ўтрымліваюць у менскім ізалятары на вуліцы Акрэсьціна.

Нагадаем: Георгія Кандэлакі й Луку Цуладзэ затрымалі 24 жніўня — нібыта для праверкі дакумэнтаў. Празь дзень ува ўправе КДБ па Менску й Менскай вобласьці заявілі, што актывісты “Кхмары” “ўмешваліся ва ўнутраныя справы Беларусі”, і таму іх вырашана дэпартаваць. Між тым, тэрмін дэпартацыі дакладна ня быў названы. 27 жніўня зь менскага аэрапорту адляцеў самалёт на Тбілісі. Аднак гэтай магчымасьцю дэпартаваць Георгія Кандэлакі й Луку Цуладзэ ўлады не скарысталіся.

Чаму дагэтуль актывістаў “Кхмары” не дэпартавалі? Вядомы ў Беларусі апазыцыйны палітык Зьміцер Бандарэнка не выключае, што грузінскіх актывістаў катавалі, і таму цяпер трымаюць за кратамі.

(Бандарэнка: ) “Мы ведаем, што часта гэта робіцца, калі людзей зьбіваюць падчас захопу, падчас разгону акцыяў. А каб сьляды зьбіцьця прайшлі, іх кідаюць на 15 сутак ці нават болей за краты. Таму я цяпер і вылучаю гэтую вэрсію: грузінскіх грамадзянаў, магчыма, ці зьбілі, ці ўжывалі супраць іх катаваньні”.

Пакуль нікому не ўдаецца сустрэцца з грамадзянамі Грузіі, якія знаходзяцца ў ізалятары на Акрэсьціна. У мінулую пятніцу, 26 жніўня, сустрэцца зь імі спрабаваў грузінскі дыплямат, які адмыслова прыехаў з Украіны. Але сустрэчы яму не дазволілі. Гэтаксама праваабаронцу з цэнтру “Вясна” Алесю Каліту не дазволілі перадаць актывістам “Кхмары” харчовую перадачу. За прычыну адмовы было названа тое, што на месцы няма кіраўніцтва ізалятару.

У панядзелак, 29 жніўня, з затрыманымі грамадзянамі Грузіі спрабаваў сустрэцца адвакат Павал Сапелка, зь якім была заключаная дамова на прававую дапамогу затрыманым. Аднак адваката да актывістаў “Кхмары” не дапусьцілі.

Грубым парушэньнем правоў суайчыньнікаў назваў утрыманьне ў менскім ізалятары Георгія Кандэлакі й Лукі Цуладзэ амбудсмэн Грузіі Созар Субары. Ён заявіў Радыё Свабода, што ад пачатку сочыць за сытуацыяй з затрыманьнем у Менску актывістаў “Кхмары”. Спадар Субары не выключае, што да вырашэньня лёсу Георгія Кандэлакі й Лукі Цуладзэ мае дачыненьне Аляксандар Лукашэнка.

(Субары: ) “Мяркую, што гэтым Лукашэнка хоча прадэманстраваць свае мускулы — паказаць, што ён не дазволіць ніякіх дэмакратычных зрухаў. Іншага не магу ўявіць”.

Дзяжурны ізалятару на Акрэсьціна заявіў мне, што затрыманых грамадзянаў Грузіі ніхто не зьбіваў. Пачуваюцца яны, паводле словаў дзяжурнага, добра.
XS
SM
MD
LG