Лінкі ўнівэрсальнага доступу

"Gazeta Wyborcza": Зьезд СПБ дакладна падрыхтаваны, вядома хто і калі будзе прамаўляць, хто прапануе якога кандыдата


Аляксей Дзікавіцкі, Варшава Польская прэса піша сёньня пра працяг рэпрэсіяў супраць Саюзу палякаў Беларусі – гэтым разам пра крымінальную справу супраць чатырох актывістаў СПБ. Вядучыя польскія газэты адзначаюць, што гэтыя рэпрэсіі зьвязаныя з заўтрашнім зьездам СПБ, які ладзіць былое кіраўніцтва гэтай арганізацыі.

Польскія газэты пішуць, што шчучынская міліцыя ўжо аднойчы спыніла справу аб меркаваных пагрозах журналістаў Андрэя Пісальніка, Андрэя Пачобута і наместнікаў старшыні СПБ – Юзафа Пажэцкага і Веслава Кеўляка на адрас дырэктара Дому польскага ў Шчучыне Віктара Богдана.

“Rzeczpospolita” (а Андрэй Пісальнік супрацоўнічае з гэтай газэтай) адзначае, што рэпрэсіі супраць актывістаў СПБ, у тым ліку і аднаўленьне крымінальнай справы, узмацніліся менавіта напярэдадні зьезду, які ладзіць старое кіраўніцтва гэтай арганізацыі.

Элемэнтам падрыхтоўкі да суботняга зьезду называе абвінавачаньні на адрас чатырох актывістаў СПБ і „Gazeta Wyborcza”, бо, паводле штодзёньніка, уся размова Віктара Богдана з актывістамі СПБ запісаная на відэастужку польскім журналістам Марцінам Сьмялоўскім і вельмі лёгка давесьці, што ніякіх пагрозаў не было.

“У суботу прызначаныя дзяржаўнай адміністрацыяй дэлегацыі маюць аддаць уладу і маёмасьць СПБ асобам, лаяльным да рэжыму Лукашэнкі. Зьезд дакладна падрыхтаваны, вядома хто і калі будзе прамаўляць, хто прапануе якога кандыдата”, --адзначае „Gazeta Wyborcza”.

Паводле штодзёньніка, гэтым плянам маглі б пашкодзіць “непакорныя лідэры СПБ, згуртаваныя вакол спадарыні Борыс”, таму ўлады хочуць іх ізаляваць, так як былога старшыню арганізацыі Тадэвуша Гавіна, які атрымаў напярэдадні чарговыя 15 сутак арышту.
XS
SM
MD
LG