Лінкі ўнівэрсальнага доступу

Беларуская прэса за 18 жніўня


Зьміцер Падбярэскі, Менск Беларуская прэса розных гадоў за 18 жніўня

“Голас Беларуса”, 1925 год. Са спасылкаю на расейскую газэту “Известия” падаецца інфармацыя пра стан асьветы ў Савецкай Беларусі:

“Пераход усіх пачатковых беларускіх школ на беларускую мову выкладаньня, паступовы пераход на тую-ж мову сярэдніх школ і многіх дысцыплін у школах вышэйшых закладаюць нязломны фундамэнт пад вялізарным гмахам беларускага нацыянальнага адраджэньня. Яшчэ некалькі гадоў, і шэрагі працаўнікоў беларускага руху папоўняцца новымі вялікімі кадрамі маладой беларускай інтэлігенцыі, якія змогуць, нарэшці, давесьці наш народ да поўнага нацыянальна-дзяржаўнага і сацыяльнага адраджэньня”.

“Віцебскі пролетарый”, 1935 год. Перадрукоўваецца наступная інфармацыя са “Звязды”:

“У камандных спаборніцтвах на ўсесаюзным злёце парашутыстаў каманда БССР заняла другое месца па найцяжэйшаму і рашаючаму практыкаванню. Шматмесны самалёт на вышыні 600 метраў выкінуў усю каманду. Парашутысты Гладкі, Архіерыеў, Рабава, Жызнеўскі, Казлоўскі і Андрыеўскі з выключнай дакладнасцю прызямліліся ў круг радыусам 100 метраў. На ўсесаюзных спаборніцтвах першае месца прысуджана камандзе закаўказскіх парашутыстаў. У індывідуальных спаборніцтвах па зацяжных прыжках на дакладнасць раскрыцця парашута парашутыст менскага аэраклуба імя Молатава тав.Гладкі заняў трэцяе месца”.

“Свабода”, год 1995. Алег Грузьдзіловіч піша:

“Навіна аб выключэньні з сістэмы адукацыі падручнікаў і дапаможнікаў узору 1992-1995 гг. падобная на выбух нэйтроннай бомбы — будынкі стаяць, у тым ліку школы і ВНУ, а ў іх усё быццам павалена. Ва ўсялякім разе так успрыняла прэзыдэнцкае распараджэньне большасьць настаўнікаў, выкладчыкаў, навукоўцаў і спэцыялістаў, якія працуюць на адукацыйнай ніве. Што значыць вярнуцца да падручнікаў камуністычных часоў? Гэта ўсё адно, што павярнуць назад кола гісторыі”.
XS
SM
MD
LG