Лінкі ўнівэрсальнага доступу

Сяргею Скрабцу сёньня перададуць тэлевізар


Уладзімер Глод, Менск Былы дэпутат Палаты прадстаўнікоў папярэдняга скліканьня, вядомы апазыцыйны палітык, які знаходзіцца у сьледчым ізалятары "Валадарка" у Менску, атрымае магчымасьць глядзець тэлебачаньне. 16 жніўня жонка экс-парлямэнтара Аляксандра Скрабец зьбіраецца перадаць мужу тэлевізар. Раней Сяргею Скрабцу выпісалі газэты --"Народная воля" і "Комсомольская правда в Белоруссии".

Сяргей Скрабец быў затрыманы 15 траўня каля свайго дому ў Менску. У той жа дзень яго адвезьлі ў Берасьцейскі сьледчы ізалятар. Там на знак пратэсту ён абвясьціў галадоўку, якая цягнулася амаль 40 дзён. Пасьля таго, як рэспубліканская пракуратура аб’яднала дзьве справы былога дэпутата — выманьваньне крэдытаў у дзяржавы і падбухторваньне да дачы хабару — у адну справу, сьледчы ў асабліва важных справах Вячаслаў Цераховіч вырашыў перавесьці арыштанта ў Менск.

Летам 2004 году Сяргей Скрабец удзельнічаў у галадоўцы дэпутатаў, якія патрабавалі дэмакратызацыі выбарчага заканадаўства. Летась у кастрычніку ён зьвярнуўся да прэзыдэнта Расеі з просьбай аб палітычным прытулку, аднак атрымаў адмоўны адказ. Сёлета ў красавіку Беларускае тэлебачаньне сьцьвярджала, што спэцслужбы затрымалі кур’ера, які вёз зь Вільні 200 тысяч даляраў, нібыта для фінансаваньня палітычнай дзейнасьці Сяргея Скрабца.
XS
SM
MD
LG