Лінкі ўнівэрсальнага доступу

Былому дэпутату Палаты прадстаўнікоў пагражае 12 гадоў турмы


Уладзімер Глод, Менск Дэпутата Палаты прадстаўнікоў папярэдняга скліканьня хочуць асудзіць на 12 гадоў пазбаўленьня волі. 8 жніўня Вярхоўны суд Беларусі разглядаў справу Мікалая Скутава, які ў ніжняй палаце парлямэнту папярэдняга складу займаў пасаду намесьніка старшыні камісіі па прамысловасьці, паліва-энэргетычнаму комплексу, транспарту, сувязі і прадпрымальніцтву.

Мікалая Скутава абвінавачваюць адразу па трох артыкулах Крымінальнага кодэксу – ў раскраданьні праз злоўжываньне службовым становішчам, незаконным ўдзеле ў прадпрымальніцкай дзейнасьці і атрыманьні хабару. Дзяржаўны абвінаваўца запатрабаваў прызначыць для экс-парлямэнтара пакараньне – 12 гадоў пазбаўленьня волі.

Мікалай Скутаў, які сёньня выступіў з апошнім словам, сваёй віны не прызнаў. Ён назваў абвінавачваньні на свой адрас "несправядлівымі і бязбожнымі". Былы дэпутат заявіў, што ён ніколі не займаўся незаконнай прадпрымальніцкай дзейнасьцю і ня лічыць такой тыя парады і рэкамэндацыі, якія ён даваў свайму сыну – кіраўніку недзяржаўнага прадпрыемства "Эўраэкасэрвіс".

Спадара Скутава абралі парлямэнтаром у 2000-м годзе. Да гэтага ён зьяўляўся генэральным дырэктарам беларускага прадстаўніцтва Закрытага акцыянэрнага таварыства "Гандлёвы нафтавы дом" і прэзыдэнтам сумеснага беларуска-расейска-украінскага таварыства "БелРосУкрнафта". Калі ён атрымаў дэпутацкі мандат, дык згодна з заканадаўствам мусіў пакінуць гэтыя пасады.

Арыштавалі былога дэпутата літаральна празь месяц пасьля абраньня новага складу Палаты прадстаўнікоў – у лістападзе 2004 году. Былыя калегі гавораць, што трывожны званок для спадара Скутава празьвінеў яшчэ за тры месяцы да арышту, калі Цэнтарвыбаркам Беларусі пацьвердзіў рашэньне Пастаўскай акруговай выбарчай камісіі аб адмове ў рэгістрацыі ягонай ініцыятыўнай групы.

Дэпутаты, якія ўваходзілі ў групу "Рэспубліка", гавораць, што ў парлямэнце спадар Скутаў паводзіў сябе на дзіва стрымана і асьцярожна. Ён амаль ніколі не карыстаўся дэпутацкай трыбунай, не прыцягваў да сябе залішняй увагі. Але ў кулюарах даволі жорстка крытыкаваў эканамічную палітыку, якую праводзіць беларуская ўлада. Дарэчы, да прапановы ўступіць у дэпутацкую групу "Рэспубліка" Мікалай Скутаў паставіўся адмоўна, пажартаваў: маўляў, я вам буду дапамагаць інкогніта. Але ніякай дапамогі ад яго "рэспубліканцы" не дачакаліся.

Мікалай Скутаў належыць да гэтак званай старой намэнклятуры. У савецкія часы ён працаваў галоўным інжынэрам Менскага аддзяленьня Беларускай чыгункі, потым узначальваў аддзел транспарту Менскага гарвыканкаму, быў кіраўніком справаў Дзяржэканомпляну БССР.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG