Лінкі ўнівэрсальнага доступу

“Жахі Трэцяга Рэйху ўзрасьлі ва ўласным доме Гітлера”


Паводле “Guardian”, Вячаслаў Ракіцкі, Прага Два нямецкія гісторыкі, якія займаюцца дасьледаваньнем асобы Гітлера, паведамілі, што знайшлі дзёньнік сястры фюрэра. Запісы сьведчаць, што ў Гітлера была праблемная сям’я і пацьвярджаюць, што “жахі Трэцяга Рэйху ўзрасьлі ва ўласным доме Гітлера”.

У інтэрвію брытанскай газэце “Guardian” нямецкія гісторыкі Тымаці Райбак і Флярыян Баерль заявілі, што “ўпершыню яны змаглі зазірнуць у мінулае сям’і Гітлера, калі ён быў у раньнім узросьце”. Паводле іх, навуковая экспэртыза даказала сапраўднасьць дзёньніка.

Дзёньнік Паўлы Гітлер сьведчыць, што яе брат быў агрэсіўным падлеткам і часта яе зьбіваў. Апісваючы самыя раньнія ўспаміны свайго дзяцінства, калі ёй было каля васьмі, а Адольфу – 15, Паўла піша: “Я зноў адчуваю цяжкую руку брата на сваім твары”.

Гісторыкі таксама знайшлі мэмуары, напісаныя сумесна зводным братам Гітлера Алёісам і зводнай сястрой Ангелай. У адным з урыўкаў падаюцца жорсткасьці бацькі Гітлера, якога таксама звалі Алёіс, і тое, як маці Адольфа спрабавала абараніць сына ад рэгулярнага зьбіцьця. Баерль гаворыць, што “паўстае карціна такой зусім дысфункцыянальнай сям’і, якой грамадзкасьць яшчэ ніколі раней ня бачыла”.

Яшчэ адно адкрыцьцё – Паўла, рэпутацыя якой дагэтуль лічылася чыстай, была заручаная з адным з самых жорсткіх лекараў Галакосту – Эрвінам Экеліюсам, адказным за забойства 4 тысячаў чалавек у газавай камэры ў часы вайны. На думку гісторыка Баерля, “тое, што яна зьбіралася пабрацца з адным з самых жахлівых аўстрыйскіх злачынцаў, азначае, што яна таксама была зьвязаная са сьмерцю, жахам і газавымі камэрамі, і ў гэтым ракурсе яе вобраз невінаватай авечкі зьнік”. Праўда, Паўла, якая пазьней жыла пад псэўданімам Вольф, ня стала жонкай Экеліюса. Гітлер не аддаў яму сястру, а накіраваў яго на Ўсходні фронт, дзе той патрапіў у рукі расейцаў.

Сярод іншых дакумэнтаў, якія дадаюць ведаў пра сям’ю фюрэра, -- сямейная бухгальтарская кніга. Адным з пунктаў у ёй значыцца пазыка 900 аўстрыйскіх кронаў, якія былі дадзеныя Гітлеру ўвесну 1908 году. Падлетку хапіла б іх на цэлы год. Гэта абвяргае міт пра тое, што ён вёў жыцьцё “беднага мастака” ў Вене.

Адкрыцьці нямецкіх гісторыкаў пабачаць сьвет у 45-хвілінным дакумэнтальным фільме, які пакажа нямецкая тэлевізія на гэтым тыдні. У фільм таксама ўключаныя інтэрвію з двума сваякамі Гітлера. Доктар Райбак кажа, што “гэтыя людзі ўпершыню загаварылі публічна пра сваё жыцьцё ў цені Гітлера. Яны не рамантызуюць свайго мінулага. Гэта звычайныя людзі, і яны ўсё жыцьцё пакутавалі пад цяжарам пракляцьця Адольфа”. Сваякі Гітлера пажадалі захаваць ананімнасьць, і іхныя твары ў фільме зьмененыя з дапамогаю лічбавай апрацоўкі.
XS
SM
MD
LG