Лінкі ўнівэрсальнага доступу

У Берасьці абіралі дэлегатаў на паўторны VI зьезд Саюзу палякаў


Алег Супрунюк, Берасьце Сёньня ў Берасьці пад кантролем прадстаўнікоў уладаў і спэцслужбаў адбыўся сход, на якім абіралі дэлегатаў ад гарадзкой арганізацыі Саюзу палякаў на плянаваны на 27 жніўня паўторны 6-ы зьезд арганізацыі.

Для правядзеньня сходу мясцовых палякаў берасьцейскія ўлады дазволілі адчыніць актавую залю грамадзка-культурнага цэнтру – нягледзячы на тое, што ў будынку цяпер ідзе рамонт. Некаторыя ўдзельнікі сходу казалі, што прадстаўнікі гарвыканкаму спэцыяльна тэлефанавалі ім дадому і настойліва запрашалі да ўдзелу ў сёньняшнім сходзе. У памяшканьні, дзе адбываўся сход, і вакол яго было заўважана шмат людзей у цывільным.

Былы старшыня абласной арганізацыі Саюзу палякаў Станіслаў Трацяк прапанаваў, каб журналістам не дазволілі прысутнічаць на сходзе, аднак большасьць удзельнікаў гэтай прапановы не падтрымалі. Спадар Трацяк вядомы тым, што браў удзел у здымках фільму “Хто замовіў Саюз палякаў?”, пасьля чаго ўлады Польшчы адмовілі яму ў магчымасьці наведваць гэтую краіну.

Адзіным пытаньнем на сходзе было абраньне дэлегатаў на паўторны VI зьезд Саюзу палякаў Беларусі, які зьбіраецца ладзіць 27 жніўня ў Ваўкавыску група прызнаванага беларускімі ўладамі за старшыню СПБ Тадэвуша Кручкоўскага. Дарэчы, на сходзе ў Берасьці было абвешчана, што спадар Кручкоўскі зьвярнуўся зь лістом да старшыні Берасьцейскага аблвыканкаму, у якім просіць дапамагчы правесьці аналягічныя сходы на тэрыторыі Берасьцейскай вобласьці.

Пасьля абраньня дэлегатаў старшыня гарадзкога аддзелу СПБ Віктар Міронаў заявіў, што складае зь сябе абавязкі кіраўніка арганізацыі.
XS
SM
MD
LG