Лінкі ўнівэрсальнага доступу

Ці пусьціць Турэччына на сваю тэрыторыю Лідзію Ярмошыну?


Алесь Дашчынскі, Менск У турэцкай амбасадзе ў Беларусі пакуль не камэнтуюць заяву старшыні Цэнтарвыбаркаму Лідзіі Ярмошынай аб намеры паехаць на адпачынак у Турэччыну.

Ці падтрымлівае Турэччына забарону на ўезд у Эўропу шэрагу беларускіх чыноўнікаў, якая ў мінулым годзе была ўведзеная Эўразьвязам, і ці патрапіць на турэцкую тэрыторыю дзеля адпачынку старшыня Цэнтарвыбаркаму Лідзія Ярмошына, якая таксама ўключаная ў сьпіс неўязных? З гэтым пытаньнем я зьвярнуўся ў амбасаду Турэччыны ў Менску. Аднак прадстаўніца амбасады адказаць на яго адмовілася і параіла зьвярнуцца па тлумачэньне ў беларускае міністэрства замежных справаў.

У сваю чаргу, кіраўніца прэсавай службы беларускага зьнешнепалітычнага ведамства Марыя Ваньшына адаслала да турэцкіх дыпляматаў.

(Ваньшына: ) “Гэта іх пытаньне, а ня наша. Выедзенага яйка ня вартае гэтае пытаньне. Ці мала хто куды едзе? Да прыватных паездак МЗС ніякага дачыненьня ня мае. Яна зьбіраецца ехаць у адпачынак, дык а мы тут пры чым?”

У інтэрвію “Комсомольской правде в Беларуси” старшыня Цэнтарвыбаркаму Лідзія Ярмошына заявіла, што зьбіраецца паехаць у адпачынак у Турэччыну, маўляў, калі яе не пускаюць у Эўрапейскі Зьвяз з прычыны візавых санкцый, то яна ў другі раз накіруецца ў Турэччыну. Гэтую інфармацыю таксама пацьвердзілі ў Цэнтарвыбаркаме. Сакратар Цэнтральнай камісіі Мікалай Лазавік сказаў, што старшыня Лідзія Ярмошына ўсур’ёз зьбіраецца ў Турэччыну.

(Лазавік: ) “Я думаю, тут праблем асаблівых не павінна ўзьнікнуць. Чаўнакі ж нашы свабодна езьдзяць туды і назад. Той, хто адпачывае, таксама едзе на курорты Турэччыны. Так што праблем тут не павінна быць. У верасьні яна зьбіраецца ў адпачынак і плянуе зьезьдзіць на пару тыдняў, як там пуцёўка будзе. Будзем спадзявацца, што ня будуць выдзяляць аднаго чалавека і для яе будзе нейкае абмежаваньне, ня думаю, што там так зробяць”.

Нагадаю, старшыня Цэнтарвыбаркаму Беларусі Лідзія Ярмошына пасьля апошняй выбарчай кампаніі трапіла ў сьпіс афіцыйных асобаў Беларусі, якім забаронены ўезд у краіны Эўразьвязу. Яна апынулася ў сьпісе неўязных, складзеным Эўразьвязам, як адказная за фальшаваньне парлямэнцкіх выбараў і рэфэрэндуму 17 кастрычніка 2004 году. Нагадаю, ад верасьня летась у гэты сьпіс спачатку патрапілі кіраўнік прэзыдэнцкай адміністрацыі Віктар Шэйман, экс-міністар спорту Юрый Сівакоў, афіцэр спэцаддзелу Дзьмітрый Паўлічэнка ды міністар унутраных справаў Уладзімер Навумаў. Гэтыя чыноўнікі фігуруюць у дакладзе Хрыстаса Пургурыдэса і лічацца ключавымі дзейнымі асобамі ў зьнікненьнях апазыцыянэраў. Адначасова з Лідзіяй Ярмошынай у сьпіс неўязных на тэрыторыю Эўразьвязу патрапіў таксама камандзір менскага АМОНу Юры Падабед, якога вінавацяць у разгоне мірных акцыяў пратэсту. У дэклярацыі Эўразьвязу за 27 верасьня 2004 году гаворыцца, што Эўразьвяз лічыць прысутнасьць гэтых асобаў на публічных сустрэчах ва ўстановах Эўрапейскага Зьвязу ці ў ягоных дзяржавах-сябрах непрымальным.

Да гэтай заявы ад імя 25 краін Эўразьвязу тады далучыліся таксама Баўгарыя, Румынія, Турэччына, Харватыя, Альбанія, Босьнія й Герцагавіна, Македонія, Сэрбія й Чарнагорыя, Ісьляндыя, Ліхтэнштэйн і Нарвэгія. Эўрапейскі зьвяз паабяцаў зрабіць усе неабходныя захады, каб прадухіліць уезд або транзыт праз сваю тэрыторыю згаданых чыноўнікаў зь Беларусі.
XS
SM
MD
LG