Лінкі ўнівэрсальнага доступу

Беларускай Эвангельскай Царкве пагражае ліквідацыя


Любоў Лунёва, Менск 18 ліпеня ў Менскім гарадзкім судзе будзе разглядацца справа аб скасаваньні рэгістрацыі Беларускай Эвангельскай Царквы.

Пастар царквы Эрнэст Сабіла патрабуе разгледзець законнасьць адпаведнай пастановы Менгарвыканкаму, падставай для якой стала тое, што царква зарэгістраваная ў жылым памяшканьні, а гэтага не дапускае новы закон аб грамадзкіх арганізацыях.

Прадстаўнікі камісіі ў справах рэлігіі Менгарвыканкаму неаднойчы ўдзельнічалі ў падобных судах, у выніку чаго многім рэлігійным канфэсіям было адмоўлена ў рэгістрацыі і ў праве зьбірацца на набажэнствы.

У 1951 годзе савецкія ўлады прысудзілі Эрнэста Сабілу, тады студэнта-мэдыка, да расстрэлу паводле абвінавачаньня ў антысавецкай прапагандзе. Улічваючы, што ў часе вайны ён быў партызанам, яму замянілі расстрэл 25 гадамі лягераў.

Эрнэст Сабіла лічыць, што цяперашнія рэпрэсіі з боку ўладаў супраць вернікаў розных неправаслаўных канфэсіяў праводзяцца ў духу НКВД сталінскіх часоў.
XS
SM
MD
LG