Лінкі ўнівэрсальнага доступу

У Горадні затрымалі і судзяць журналістаў (абноўлены)


Сяргей Астраўцоў, Горадня Сёньня Ў Горадні на плошчы Леніна міліцыянты затрымалі журналістаў, якія пратэставалі супраць таго, што выходзіць “самазванчы” пірацкі “Głos znad Niemna”. Улады не даюць выпускаць сваю газэту Саюзу палякаў, які насамрэч зьяўляецца заснавальнікам “Głosu”. Сярод затрыманых – галоўны рэдактар “Głosu znad Niemna” Анджэй Пісальнік, ягоныя супрацоўнікі Інэса Тодрык, Ігар Банцар, а таксама галоўны рэдактар часопіса “Magazyn Polski” Андрэй Пачобут і карэспандэнт газэты “Салідарнасць” Іван Роман. Іх даставілі ў пастарунак, а пасьля абеду — у суд.

Вынікі суду – штрафам пакараны двое зь пікетоўцаў. На 200 базавых адзінак Андрэй Пачобут, гэта 5 мільёнаў 125 тысяч рублёў. І на 20 базавых адзінак аштрафаваны Ігар Банцар. Іх судзілі за ўдзел у несанкцыянаваным пікеце і непадпарадкаваньне міліцыі. Суд над астатнімі ўдзельнікамі пікету адбудзецца ў пятніцу.

Сёньняшняя акцыя адбывалася скончылася вельмі хутка. Міліцыянты пачалі абступаць пікетоўцаў амаль адразу пасьля таго, як ім удалося разгарнуць свой транспарант цалкам. На ім было напісана па-польску: “Аддайце палякам “Głos znad Niemna”.

(Міліцыянт: ) “Вы аказваеце непадпарадкаваньне супрацоўнікам міліцыі. Я сказаў: спыніць вашыя дзеяньні”.

Пастарунак знаходзіцца непадалёк ад плошчы, і пікетоўцаў павялі туды пешшу. У гэты час галоўны рэдактар “Głosu znad Niemna” Анджэй Пісальнік сказаў для нашага Радыё наступнае:

(Пісальнік: ) “Акцыя доўжылася хіба менш за хвіліну. Гэта сьведчыць толькі пра тое, што гэтую уладу настолькі вольнае слова пужае, што яна змабілізавала вось якія вялікія сілы міліцыі і іншых органаў, падазраю, таксама і КГБ, каб не дапусьціць маленькага пікету”.

Пікетоўцы не пасьпелі раздаць свае ўлёткі з заклікам: “Аддайце палякам “Głos znad Niemna”!" Яны былі надрукаваныя на беларускай і польскай мовах. Ва ўлётцы гаворыцца:

"Мы, супрацоўнікі тыднёвіка “Głos znad Niemna”, пратэстуем супраць захопу ўладай Горадні, а таксама беларускімі спэцслужбамі адзінай у Беларусі газэты польскай меншасьці. Газэта, якая выходзіць сёньня пад шыльдай “Głosu znad Niemna”, ня мае нічога агульнага з Саюзам палякаў".

Ва ўлётцы гаворыцца таксама, што ўлады спрабуюць прадставіць палякаў як неляяльных да дзяржавы і варожых беларусам грамадзянаў. Якраз адным з галоўных элемэнтаў гэтай “прапагандысцкай вайны” сталася перайманьне ўладамі газэты “Głos znad Niemna”, зазначаюць аўтары ўлёткі.
XS
SM
MD
LG