Лінкі ўнівэрсальнага доступу

Аўтамабілісты выставяць Скарыну і Машэрава на лабавое шкло?


Уладзімер Глод, Менск Кіроўцам аўтамабіляў прапануюць пакласьці за лабавое шкло карткі з выявамі Скарыны і Машэрава. Адпаведны зварот зрабіла 25 траўня Сталая нарада дэмакратычных сілаў Беларусі. Ініцыятары акцыі мяркуюць, што такім чынам кіроўцы выступяць супраць рашэньня аб перайменаваньні сталічных праспэктаў.

Ідэя прыцягнуць кіроўцаў да абароны памяці славутых беларусаў узьнікла на сёньняшнім паседжаньні дэмакратаў. Яны працягваюць шукаць новыя нестандартныя хады, якія б прыцягнулі ўвагу, перадусім, менчукоў да гарадзкога рэфэрэндуму. Менавіта на ім можна ў межах закону спыніць працэс перайменаваньня менскіх вуліцаў і захаваць іх старыя назвы.

Намесьнік старшыні Аб’яднанай грамадзянскай партыі Аляксандар Дабравольскі згадвае, што культурніцкая акцыя лідэраў моладзевага палітычнага руху, якая прайшла 23 і 24 траўня на праспэктах Машэрава і Скарыны, падштурхнула і партыйцаў да пошуку. А пра сутнасьць новай акцыі ён гаворыць так:

(Дабравольскі: ) “Мы вырашылі рэкамэндаваць усім партыям, усім удзельнікам нашай нарады выступіць з заклікам да кіроўцаў аўтамабіляў, каб яны выставілі карткі Машэрава і Скарыны за шкло сваіх машынаў на знак пратэсту супраць перайменаваньняў”.

Спадар Дабравольскі спадзяецца, што новая ініцыятыва будзе падтрыманая:

(Дабравольскі: ) “Мы спадзяёмся і нават упэўненыя, што гэтую акцыю падтрымаюць. Упэўненыя таму, што на наш офіс штодзень прыходзіць больш за сто, нават пад дзьвесьце лістоў ад людзей, якія пратэстуюць супраць перайменаваньня гэтых праспэктаў”.

Я пацікавіўся ў свайго суразмоўцы, дзе кіроўцы, якія захочуць уключыцца ў аб’яўленую акцыю, змогуць знайсьці карткі з выявамі Скарыны ды Машэрава. Аляксандар Дабравольскі паведаміў, што ўжо 26 траўня гэтыя здымкі зьявяцца на сайтах шэрагу апазыцыйных палітычных партыяў, адкуль іх можна будзе скапіяваць. А яшчэ празь некалькі дзён зьявяцца і адпаведныя паштоўкі.

Некаторыя дэмакратычныя актывісты ня хочуць пагаджацца з тым, што імя Францішка Скарына апынулася ў адной зьвязцы з былым кіраўніком беларускіх камуністаў. Удзельнік Сталай нарады дэмакратычных сілаў Станіслаў Шушкевіч зьвяртае ўвагу на тое, што такое аб''яднаньне адбылося зь ініцыятывы Лукашэнкі:

(Шушкевіч: ) "Гэта вельмі не простае пытаньне, таму што гэта -- штучнае злучэньне, якое адбылося выпадкова. Для мяне Скарына -- гэта сьвяты чалавек. Я нічога ня маю супраць і Пятра Машэрава. Але гэта -- не простая постаць, гэта -- складаная постаць".

Гл. таксама • Акцыю пратэсту супраць перайменаваньня вуліцаў на праспэцке Скарыны разагналі амонаўцы (фотарэпартаж)
XS
SM
MD
LG