Лінкі ўнівэрсальнага доступу

Акцыю пратэсту супраць перайменаваньня вуліцаў на праспэцке Скарыны разагналі амонаўцы (фотарэпартаж)


Галіна Абакунчык, Менск (Эфір – 24 траўня 2005.) У Менску на праспэкце Францішка Скарыны прайшлі акцыі пратэсту супраць перайменаваньня вуліцаў і праспэктаў сталіцы. “Ланцуг неабыякавых людзей” адбыўся паводле рашэньня Сталай нарады дэмакратычных сілаў з удзелам прадстаўнікоў палітычных партыяў. Мастацкую акцыю-пэрфоманс арганізавалі прадстаўнікі моладзевага грамадзка-палітычнага руху. Абедзьве акцыі былі разагнаныя сіламі АМАП, затрымана восем чалавек.

Чалавек у мантыі Францішка Скарыны, якога вядуць пераапранутыя ў міліцэйскую форму маладзёны, узброеныя дубінкамі й дзіцячымі пісталетамі – так выглядзеў флэш-моб, арганізаваны сябрамі Маладога фронту й іншых арганізацыяў.

Акцыя распачалася й завяршылася за некалькі хвілінаў: яе ўдзельнікі пасьпелі крыкнуць усяго некалькі словаў перад тым, як амонаўцы заштурхалі іх у аўтобус.

(Галасы: ) “Абараніце Скарыну!”

(Галасы: ) “За што вы іх затрымліваеце?”

(Галасы: ) “Скарыну абараніце!”

Удзельнікі “Ланцугу неабыякавых людзей” з партрэтамі Францішка Скарыны выстраіліся ўздоўж праспэкту Скарыны праз гадзіну. Але й да іх неўзабаве падышлі амонаўцы. Яны не хапалі людзей, але пачалі выцясьняць іх з галоўнай сталічнай магістралі на вуліцу Няміга. Пры гэтым, яны адбіралі партрэты першаршадрукага з рук пратэстоўцаў і разрывалі іх на кавалкі. Вось як на гэта рэагавалі ўдзельнікі акцыі.





(Удзельніца: ) “Я ня думала, што людзі ў форме замест таго, каб абараняць людзей, выхопліваюць з рук партрэты і рвуць іх.”

(Удзельніца: ) “Куды ідуць нашыя падаткі? Ды вось на пракорм гэтых здаровых і нахабных у форме.”

Разгон акцыі пратэсту адбываўся на вачах у сотняў менчукоў, многія зь якіх даведаўшыся пра сутнасьць падзеі выказвалі сваю падтрымку пратэстоўцам. Вось што, у прыватнасьці, сказалі Свабодзе сямейная пара пэнсіянэраў.

(Спадар: ) “Я ня думаю, што ёсьць вэтэраны, якія запатрабуюць перайменаваньня праспэкта Машэрава. Я не кажу пра тое, якім ён быў насамрэч, але для вэтэранаў гэта сымбаль.”

(Спадарыня: ) “Навошта ўвогуле гэтае перайменаваньне? Гэта ж нашая гісторыя!”

Амоўнаўцы пакінулі ўдзельнікаў акцыі толькі пасьля таго, як выціснулі іх на ўзьбярэжную Сьвіслачы.







Адзін з арганізатараў “Ланцугу неабыякавых людзей” ад партыі Беларускага народнага фронту Аляксей Янукевіч ягоны вынік падсумаваў гэтак.

(Янукевіч: ) “Шкада, канечне, што мы ня здолелі пастаяць на праспэкце Францішка Скарыны, але досыць шмат людзей пабачылі, як мірных грамадзянаў АМАПаўцы штурхаюць і гоняць няведама куды. Я думаю, што гэта зрабіла на людзей пэўнае ўражаньне й я нават перакананы, што многія задумаюцца куды ідзе Беларусь і што ж адбываецца ў нашай краіне. А некаторыя можа нават пачнуць па-новаму ацэньваць сітуацыю ў краіне і далучацца да шэрагу змагароў за свабоду й незалежнасьць.”
XS
SM
MD
LG