Лінкі ўнівэрсальнага доступу

logo-print

Колькі чалавек расстралялі ва Ўзбэкістане?


Юры Дракахруст, Прага Генэральны пракурор Узбэкістану Рашыд Кадыраў заявіў, што падчас хваляваньняў на ўсходзе краіны на мінулым тыдні загінула 169 чалавек. Паводле дадзеных праваабаронцаў у апазыцыі ахвяраў значна больш – да 740 чалавек. Сёньня група дыпляматаў і журналістаў наведала Андыжан, цэнтар крывавых падзеяў мінулага тыдня.

Генэральны пракурор Узбэкістану назваў лічбу ахвяраў падзеяў у Андыжане – 169 загіблых, у тым ліку 32 ўрадавых салдата. Большасьць астатніх, паводле пракурора былі тэрарыстамі, у тым ліку замежнікамі.

Пры гэтым сам прэзыдэнт Іслам Карымаў адхіліў абвінавачваньні ў тым, што войскі забілі шмат цывільных жыхароў. Ён абвінаваціў заходнія мэдыі ў скажэньні фактаў і няпраўдзе. Карымаў.

(Карымаў: ) "Што гэта за мірная дэманстрацыя, якая добра ўзброіўшыся, атрымаўшы зброю з-за межаў Узбэкістану нападае на міліцэйскую вайсковую частку, потым на рэгулярную вайсковую частку, забірае, як сказаў пракурор, да 305-ці адзінак аўтаматычнай зброі, сотні пісталетаў, гранат, 4 кулямёта, нападае на турму, вызваляе да шасьцісот зьняволеных, а потым праводзіць мірную дэманстрацыю".

Аднак відавочцы і правааборонцы настойваюць на тым, што ахвяраў падзеяў у Андыжане было значна больш, чым падаюць улады.

Сёньня групе дыпляматаў і журналістаў было дазволена наведаць Андыжан. Іх вазілі па горадзе на аўтобусе, не дазваляючы сустракацца зь мясцовымі жыхарамі.Тым ня менш яшчэ ў канцы мінулага тыдня ўлады пачалі прыбіраць з вуліцам целы загіблых, прычым паводле зьвестак нашага карэспандэнта Садзідзіна Ашэрава, гэта рабілася выбарачна. Вось што сказаў яму адзін з жыхароў Андыжану.

(Мужчына з Андыжана: ) "Учора ноччу яны ўбралі з вуліцаў усе целы жанчын і дзяцей, бо немагчыма сказаць, што яны тэрарысты. Засталіся толькі целы мужчынаў. Яны па ўсім горадзе".

Гэтая жыхарка Андыжану таксама нязгодная з афіцыйнай вэрсіяй падзеяў.

(Жанчына з Андыжана: ) "Як вы назавеце таго, хто забівае свой народ? Гэта нішто іншае, як генацыд. Гэта горш за фашыстаў. Яны стралялі ў жанчын і дзяцей. Далоў Карымава!"

Калі лічба ахвяраў, якую падаюць праваабаронцы пацьвердзіцца, то гэта будзе самае крывавае падаўленьне масавых выступаў з 1989 году, калі кітайскія ўлады танкамі раздавілі пратэсты на плошчы Цяньаньмынь у Пэкіне.

Паводле афіцыйнай вэрсіі арганізатарамі забурэньняў ва Ўзбэкістане былі ісламскія экстрэмісты, якія імкнуцца стварыць у рэгіёне тэакратычную дзяржаву. Дарэчы, вэрсію аб ісламісцкай подбіўцы пратэстаў падтрымалі кіраўнікі суседніх Таджыкістану і Кіргістану, прынамсі выканаўца абавязкаў прэзыдэнта Кыргістану Курманбэк Бакіеў – лідэр нядаўняй цюльпанавай рэвалюцыі.

Некаторыя расейскія выданьні прыводзяць меры Карымава, як прыклад таго, як трэба змагацца з “аксамітнымі рэвалюцыямі”.

Але на думку нашага карэспандэнта Андрэя Бабіцкага, які зараз знаходзіцца ва Ўзбэкістане, падзеі мінулага тыдня наўрад ці ўмацавалі ўладу Карымава.

(Бабіцкі: ) "Мне здаецца, што гэта аслабіла рэжым Карымава. Мне здаецца, што сёньня многія разумеюць, па меншай меры ў Андыжане, што ўсе тлумачэньні наконт падзеяў абсалютна хлусьлівыя, тут вуліца ненавідзіць Карымава. Насамрэч сытуацыя ва Ўзбэкістане для Карымава вельмі выбуховая, небясьпечная, бо галеча жахлівая і сацыяльны пратэст можа быць спароджаны любой падзеяй".

Гэта быў карэспандэнт нашага радыё Андрэй Бабіцкі.
XS
SM
MD
LG