Лінкі ўнівэрсальнага доступу

Саюз палякаў у Горадні наведалі міліцыянты, патрабавалі тлумачэньняў


Сяргей Астраўцоў, Горадня Сёньня Саюз палякаў Беларусі наведалі міліцыянты пасьля таго, як ля будынку сабраліся некалькі дзесяткаў пажылых сябраў СПБ. Міліцыянты спаслаліся на тое, што ім па тэлефоне з рэдакцыі “Глоса з-над Нёмна” паведамілі, што ля Дома палякаў нібыта сабраўся несанкцыянаваны мітынг, а на балконе вывешаны транспарант. На транспаранце былі напісаны па-польску пачатковыя словы гімну СПБ “Ня кінем зямлю, адкуль наш род...”

Міліцэйская машына дзяжурыла насупраць сядзібы СПБ цягам некалькіх гадзінаў. А двух супрацоўнікаў рэдакцыі газэты “Глос з-над Нёмна” выклікалі ў РАУС, дзе яны далі свае тлумачэньні.

Пажылыя ўдзельнікі Саюзу палякаў зьбіраліся, каб выказаць сваё абурэньне былому старшыню СПБ Тадэвушу Кручкоўскаму. Міністэрства юстыцыі лічыць, што ён па-ранейшаму павінен кіраваць гэтай грамадзкай арганізацыяй, а таксама не прызнае вынікаў апошняга 6-га зьезду СПБ, на якім было абрана новае кіраўніцтва.

Беларускае тэлебачаньне паказала “выкрывальны” фільм пра Саюз палякаў, выкарыстаўшы для гэтага самога спадара Кручкоўскага. Ён, аднак, пакуль не зьявіўся ў сядзібе СПБ.

Дарэчы, фільм “Хто замовіў Саюз палякаў?” БТ у мінулую суботу асудзіла Галоўная рада Саюзу, якая зьбіралася ў Горадні. Яе ўдзельнікі вырашылі патрабаваць ад Беларускага тэлебачаньня абвяржэньня паказаных у фільме “паклёпніцкіх выдумак” і прасіць Пракуратуру РБ прыцягнуць аўтараў і ўдзельнікаў фільма да крымінальнай адказнасьці.

У СПБ сёньня паведамілі, што пасьля дэманстрацыі па БТ “Хто замовіў Саюзу палякаў?” у Наваградку ў Доме польскім нехта пабіў шыбы.

Гл. таксама • Насуперак патрабаваньням Мін''юсту Саюз палякаў ня хоча праводзіць паўторны зьезд • МЗС Польшчы супраць скасаваньня вынікаў апошняга зьезду Саюзу палякаў Беларусі
XS
SM
MD
LG