БАГДАД. На паўночным ўсходзе Іраку сілы кааліцыі працягваюць апэрацыю з кодавым назовам “Матадор”. Мэта апэрацыі – ліквідацыя баевікоў групоўкі Абу Мусабы аз-Заркаўі.
Паводле дадзеных вайскоўцаў, цягам апошніх некалькіх дзён, забітыя больш за сто замежных наёмнікаў, якія дапамагалі аддзелам аз-Заркаўі. Амэрыканскі бок згубіў 9 чалавек.
Між тым ў Іраку не спыняюцца тэракты.
На ўскраіне Багдаду ў выніку выбуху забітыя дзьве асобы, а дзьве параненыя. Усе яны – мірныя жыхары. Гаворыць мясцовы паліцыянт.
(Паліцыянт) “Супрацоўнікі камунальных службаў як раз скончылі прыбіраць сьмецьце на вуліцы і тут на тратуары выбухнула бомба. Двое дворнікаў загінулі на месцы, а рэшту павезьлі ў шпіталь”.
Між тым у горадзе Бакуба тэрарыст-самагубца ўзарваў замінаваны аўтамабіль – трое паліцыянтаў параненыя.