Лінкі ўнівэрсальнага доступу

logo-print

13 траўня ў Беларусі традыцыйна ўшаноўваўся сьвяты Якуб


Ул.інф. Што адбывалася ў Беларусі і сьвеце 13 траўня

На Якуба, казалі, грэе люба. Гэта значыць, прыйшло сапраўднае летняе цяпло. У гэты дзень нараджаліся звычайна людзі з вайсковай выпраўкай і збройнымі подзьвігамі. Напрыклад, герой “Лядовага пабоішча” князь Аляксандар Неўскі прыйшоў на сьвет у такі дзень у 1221 годзе. У Беларусі ягонае імя шырака загучала ў другой палове 19 ст., калі расейскія ўлады пасьля задушэньня паўстаньня Каліноўскага ўводзілі праваслаўе і пад кіраўніцтвам графа Мураўёва будавалі цэрквы, так званыя мураўёўкі. Дык вось, многія гэтыя цэрквы насілі імя сьвятога Аляксандра Неўскага. Адна такая і цяпер стаіць пасярод Менску, на Вайсковых могілках.

Вайскоўцам быў і народжаны 13 траўня 1840 году Цітус Далеўскі, найбліжэйшы памочнік Кастуся Каліноўскага. Нікім іншым гэты паўстанец пабыць не пасьпеў, бо толькі скончыў унівэрсытэт і быў расстраляны ў Вільні, калі меў усяго 23 гады.

У Івана Ермачэнкі ўсё жыцьцё было прысьвечана палітыцы і вайсковай справе. Ён нарадзіўся ў Капачоўцы пад Барысавам 13 траўня 1894 году. У часе мінулай вайны ўзначальваў Беларускую народную самапомач і быў дарадцам генэральнага камісара Беларусі Вільгельма Кубэ. Рэшту жыцьця калябарант Ермачэнка правёў у эміграцыі ў ЗША.

Дзьве невайсковыя даты. 13 траўня 1905 году нарадзілася легенда беларускага тэатру артыстка Стэфанія Станюта. У гэты ж дзень у 1933-м прыйшоў на сьвет мастак Аляксандар Кішчанка, аўтар слыннага “Габэлену стагодзьдзя”, на якім выяўленыя самыя значныя постаці сьвету і Беларусі. Пасьпеў мастак уставіць туды і Аляксандра Лукашэнку. А ня стала Кішчанкі ў 1997-м.
XS
SM
MD
LG