Лінкі ўнівэрсальнага доступу

Польшча ня можа даведацца прозьвішчы ўсіх ахвяраў Катынскай трагедыі з-за пазыцыі беларускіх уладаў


Аляксей Дзікавіцкі, Варшава Cакратар польскай дзяржаўнай Рады Аховы Памяці Змаганьняў і Пакутніцтва Анджэй Пшэвозьнік заявіў нашаму радыё, што Польшча ня можа даведацца прозьвішчы ўсіх ахвяраў Катынскай трагедыі з-за пазыцыі беларускіх уладаў.

Анджэй Прэвозьнік кажа, што ў Беларусі супрацоўнікамі НКВД маглі быць расстраляныя каля 3 тысячаў палякаў з 22-х.

(Пшэвозьнік: ) “Імёны гэтых людзей мы, аднак, ня ведаем. Ніякіх дакумэнтаў, дзе гаварылася б пра іхныя імёны, мы не пабачылі”.

Сакратар дзяржаўнай Рады Аховы Памяці Змаганьняў і Пакутніцтва кажа, што імёны ахвяраў сталінскага тэрору нельга даведацца з-за пазыцыі беларускіх уладаў.

(Пшэвозьнік: ) “Мы пачалі размаўляць зь беларуcкім бокам яшчэ на пачатку 1990-х, і нейкія вынікі сапраўды былі. Але потым, калі прэзыдэнтам стаў Аляксандар Лукашэнка, усё зьмянілася, і цяпер ніякага супрацоўніцтва ўвогуле няма”.

Анджэй Пшэвозьнік кажа, што асабіста пачуў ад прадстаўнікоў беларускіх уладаў, што палякаў, якія ляжаць у Курапатах, расстралялі немцы.

(Пшэвозьнік: ) “Несумненна, што калі паглядзець на тое, што мы сёньня ведаем пра генацыд польскага народу, які завецца Катынскай трагедыяй, дык тут ёсьць толькі адна пляма, калі гаворка ідзе пра Беларусь”.
XS
SM
MD
LG