Лінкі ўнівэрсальнага доступу

У Боне ўцекачы зь Беларусі зладзілі пікет да Дня Волі


Казімер Яноўскі, Гомель 25 сакавіка, а 15-й гадзіне, у Боне, былой сталіцы Заходняй Нямеччыны, каля аддзяленьня беларускай амбасады адбылася імпрэза з нагоды 87-х угодкаў утварэньня Беларускай Народнай Рэспублікі.

Пра пікет Нямеччыне паведаміў палітычны ўцякач з Гомелю Яўген Мурашка. Ён зь сям’ёй жыве цяпер ў горадзе Ландсхут, у Баварыі. Спадар Мурашка быў адным з арганізатараў сёньняшняй імпрэзы. Яму слова:

(Мурашка: ) “Зьвяз беларусаў Нямеччыны ладзіць пікет з нагоды Дня Волі. Пікет з дазволу уладаў зарганізаваны каля будынку беларускай амбасады ў Боне”.

Паводле словаў Мурашкі, у пікеце бралі ўдзел больш за дзясятак былых уцекачоў зь Беларусі. Яны адмыслова прыехалі да аддзяленьня беларускай амбасады ў Бон зь Мюнхэну, Брэмэну, Трыру ды іншых гарадоў, каб аддаць даніну павагі мужным змагарам БНР і нагадаць ня столькі немцам, колькі афіцыйным беларускім дыпляматам пра слаўную дату ў гісторыі краіны.

Пікет ладзіўся пад бел-чырвона-белымі сьцягамі. На трох адмысловых стэндах зьмешчаны былі фатаздымкі са сьвяткаваньня ў розныя гады Дня Волі ў Менску — у тым ліку і тыя фатаздымкі, на якіх відаць, як беларускія міліцыянты зьбіваюць дэманстрантаў. Пікет каля будынку аддзяленьня беларускай амбасады доўжыўся дзьве гадзіны.
XS
SM
MD
LG