Лінкі ўнівэрсальнага доступу

Як вы ставіцеся да патрабаваньняў вызваліць М. Марыніча?


Марыя Ўсьціновіч, Магілёў Як вы ставіцеся да патрабаваньняў міжнароднай супольнасьці аб вызваленьні Марыніча? Ці падтрымліваеце іх? — з такімі пытаньнямі зьвярнулася да жыхароў Магілёва наша карэспандэнтка. У апытаньні бралі ўдзел мінакі на магілёўскіх вуліцах і актывісты розных грамадзкіх арганізацыяў.

(Спадар: ) “Падтрымліваю намаганьні міжнароднай супольнасьці ў абарону Марыніча. Рэжым папросту выкарыстаў Марыніча як пудзіла ў запалохваньні чынавенства, вышэйшага чынавенства перадусім”.

(Спадарыня: ) “Канечне, падтрымліваю. Таму што гэта ганьба для краіны — тое рашэньне суду, якое вынесена ў дачыненьні да Марыніча”.

(Спадар: ) “Канечне. Я яго ведаю асабіста: добры чалавек, вельмі кампэтэнтны, граматны і, я мяркую, вельмі прыстойны чалавек”.

(Спадар: ) “Тое, што зрабіла наша ўлада з Марынічам, зусім не стасуецца з тым, што адбываецца з тымі людзьмі, якія былі асуджаны за крадзеж у вялікіх памерах, напрыклад Жураўковай. І чалавека бязьвіннага пакаралі больш жорстка, чым людзей, якія вінаватыя, скралі вялікія грошы і яны не сядзяць у турме”.

(Спадар: ) “Калі шчыра, то я нават ня ведаю, хто гэта такі. Калі гэта апазыцыянэр і яго за нешта ўлады зачынілі, то, можа, гэта і правільна, што спрабуюць зрабіць нешта, прыцягнуць увагу грамадзкасьці, хоць неяк спрабуюць паўплываць на нашага прэзыдэнта”.

(Спадар: ) “Прозьвішча Міхаіла Марыніча я недзе чуў. А высілкі міжнародных арганізацыяў у яго вызваленьні — я ня думаю, што яны будуць мець нейкі сэнс, таму што немагчыма ціснуць на нашае кіраўніцтва такім чынам. Яно толькі азлабляецца, і будзе яшчэ горш”.

(Спадар: ) “Я лічу, што вызваленьне Марыніча — гэта цяпер тая праблема, ад вырашэньня якой залежыць, як замежныя дзяржавы будуць сябе паводзіць у дачыненьні да кіраўнікоў нашай дзяржавы”.

(Спадар: ) “Я гэта падтрымліваю і лічу, што ягонае знаходжаньне ў турме абсалютна палітычна матываванае. А апошнія падзеі, зьвязаныя зь ягоным інсультам і паводзінамі турэмнай адміністрацыі паказваюць, што ягонае жыцьцё пад пагрозай”.

(Спадар: ) “Я лічу, што гэта справа чыста палітычная У нашай краіне ўсе намаганьні міжнароднай супольнасьці… На гэта глядзяць скрозь пальцы, таму цяжка сказаць, чым гэта скончыцца”.

Магілёўцы распавядалі, як яны ставяцца да намаганьняў міжнароднай супольнасьці аб вызваленьні Міхаіла Марыніча.
XS
SM
MD
LG