Лінкі ўнівэрсальнага доступу

logo-print

Апазыцыя заняла будынак абласной адміністрацыі ў Таласе


Юры Дракахруст, Прага У Кыргызстане апазыцыя сёньня працягвае акцыі пратэсту з патрабаваньнем скасаваць вынікі нядаўніх парлямэнцкіх выбараў. Сёньня маніфэстанты перакрылі шашу Ош-Бішкек. У горадзе Талас яны сёньня вызвалілі губэрнатара вобласьці, захопленага 2 дні таму.

Удзельнікі масавых акцыяў пратэсту ў Таласе працягваюць утрымліваць будынак абласной адміністрацыі, заняты два дні таму. Аднак яны вызвалілі з аблогі губэрнатара вобласьці Іскандэра Айдараліева. Гэта было зроблена паводле просьбы аднаго зь лідэраў апазыцыі, Раўшана Іенбекава, які пацярпеў паразу на апошніх парлямэнцкіх выбарах. Зьвяртаючыся да сваіх прыхільнікаў, апазыцыйны лідэр казаў:

(Іенбекаў: ) “Ня будзе аніякай перашкоды, каб губэрнатар выйшаў. Мы гэта вырашылі з вамі. Мы дамовіліся пра гэта? Мы пагадзіліся? Давайце вызвалім шлях. Адкрыйце шлях”.

Удзельнікі акцыяў пратэсту патрабуюць перагаласаваньня парлямэнцкіх выбараў у Таласе і звальненьня мясцовых кіраўнікоў.

Між тым, сёньня маніфэстанты занялі будынак мясцовай адміністрацыі яшчэ ў адным горадзе на поўдні краіны ў Джэлалабадзе.

Дэвід Льюіс, дырэктар сярэднеазіяцкага праекту Міжнароднай крызыснай групы, адзначае, што акцыі пратэсту праходзяць дастаткова дысцыплінавана.

(Льюіс: ) “У вялікай ступені лідэры апазыцыі трымаюць масавыя выступы пад кантролем і відавочна спрабуюць накіраваць іх на падтрымку патрабаваньняў аб зьмене палітыкі. Іх галоўнае патрабаваньне – датэрміновая адстаўка прэзыдэнта Акаева. Яны спрабуюць аб’яднаць людзей вакол гэтага лёзунга. Яны маюць пэўную падтрымку на поўдні і ў такіх месцах як Талас”.

Паводле экспэрта ўлада дэманструе пэўную разгубленасьць, няведаньне, яек рэагаваць на масавыя выступы пратэсту.

Прэзыдэнт Аскар Акаеў учора абвінаваціў лідэраў апазыцыі ў спробе распаліць грамадзянскую вайну і папярэдзіў, што асобы, якія захопліваюць адміністрацыйныя будынкі, будуць пакараныя.

(Акаеў: ) “Той, хто арганізоўваў масавыя забурэньні, будуць абавязкова несьці адказнасьць за стварэньне напружанасьці ў некаторых рэгіёнах краіны. Я заклікаю нашых грамадзянаў у Таласе, Джэлалабадзе і Ўзгене заставацца спакойнымі”.

На думку Дэвіда Льюіса калі ўлады ня пойдуць на кампраміс, то сытуацыя можа яшчэ больш абвастрыцца.
XS
SM
MD
LG