Лінкі ўнівэрсальнага доступу

“Заява расейскага МЗС шакуе, бо нагадвае тое, што казала Кацярына ІІ, пазбаўляючы Польшчу незалежнасьці”


Аляксей Дзікавіцкі, Варшава Гэтымі днямі мінула 60-я гадавіна падпісаньня пагадненьняў у Ялце. МЗС Расеі зрабіў афіцыйную заяву, у якой ганіць палякаў і іншыя народы за “спробы перапісаць гісторыю ІІ сусьветнай вайны” і паказаць, што вынікі ялцінскай канфэрэнцыі былі для Польшчы некарысныя. У Польшчы кажуць, што гэтая заява зробленая ў стылі “Сталіна і Кацярыны ІІ, якая таксама казала, што нясе свабоду”, ды заклікаюць прэзыдэнта Квасьнеўскага ня ехаць у Маскву на сьвяткаваньне 60-х угодкаў перамогі.

Паводле расейскіх дыпляматаў, менавіта ў Ялце саюзьнікі пацьвердзілі жаданьне зрабіць Польшчу свабоднай, незалежнай і дэмакратычнай дзяржавай, а таксама перадаць Польшчы дадатковыя тэрыторыі на захадзе і поўначы, замест страчаных на ўсходзе, гарантам чаго быў Савецкі Саюз, які падпісаў адпаведныя пагадненьні зь Нямеччынай.

Між тым у Польшчы, канфэрэнцыя ў Ялце сталася сымбалем здрады саюзьнікаў, якія бяз згоды саміх палякаў на 45 гадоў аддалі Польшчу і іншыя краіны ўсходняй і цэнтральнай Эўропы пад кантроль камуністаў – гэтыя гады асацыююцца ў большасьці палякаў з фальсыфікаванымі выбарамі, тэрорам і перасьледам, а не са свабодай і дэмакратыяй.

(Вечаркевіч: ) “Заява расейскага МЗС шакуе, бо нагадвае тое, што казала Кацярына ІІ, пазбаўляючы Польшчу незалежнасьці – гэта былі дакладна такія ж словы – яна таксама несла свабоду палякам”.

Заява расейскіх дыпляматаў выклікала пратэсты як ў польскіх посткамуністаў, так і ў лібэралаў.

(Налэнч: ) “Калі б я ня бачыў даты пад гэтым тэкстам, дык падумаў бы, што гэтая заява напісаная пад дыктоўку Сталіна – там жа хлусьня на хлусьні!”

– заявіў віцэ-сьпікер польскага Сэйму Томаш Налэнч, адзін зь лідэраў сацыял-дэмакратычнай партыі Польшчы.

У сваю чаргу, кіраўнік вядучай апазыцыйнай партыі “Грамадзянская плятформа”, таксама віцэ-сьпікер Дональд Туск сказаў, што ў такой сытуацыі паездка прэзыдэнта Квасьнеўскага ў Маскву на сьвяткаваньне 60-й гадавіны перамогі была б “прыніжэньнем нацыянальнай годнасьці палякаў”.

Між тым МЗС Польшчы заявіў, што ня бачыць неабходнасьці адказваць на такія заявы, а кіраўнік польскай дыпляматыі Адам Ротфэльд выказаў “зьдзіўленьне тым, што камусьці прыйшло ў галаву хваліць тую сыстэму няволі”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG