Лінкі ўнівэрсальнага доступу

Газэта “Прессбол” павінна распачаць выплату міністру фінансаў Мікалаю Корбуту 40 мільёнаў рублёў “за маральныя страты”


Ігар Карней, Менск Ад сёньня спартовая газэта “Прессбол” мусіць пачаць кампэнсоўваць маральныя страты міністру фінансаў Мікалаю Корбуту, які паралельна ўзначальвае Беларускую асацыяцыю гімнастыкі. Разам газэта і галоўны рэдактар павінны выплаціць чыноўніку 40 мільёнаў рублёў, альбо блізу 20 тысяч даляраў. Судовая калегія Менскага гарадзкога суду пакінула ў сіле ранейшае рашэньне суду Цэнтральнага раёну сталіцы.

Галоўны рэдактар газэты “Прессбол” Уладзімер Беражкоў заклапочаны будучыняй газэты і немалога працоўнага калектыву. Ён не выключае, што газэта вымушаная будзе спыніць існаваньне.

Тым ня меней, дырэктар унітарнага прадпрыемства “Прессбол-плюс” Юры Арлоў кажа, што спробаў штосьці аспрэчваць з боку “Прессбола” больш ня будзе.

(Арлоў: ) “Больш нікуды апэляцыяў падаваць ня будзем, бо гэта, калі можна так сказаць, была “праверачная” касацыя. Звычайна такі крок робяць, каб праверыць: можна штосьці зьмяніць, ці не? Цяпер мы проста пераканаліся: нічога зьмяніць нельга”.

Ад пачатку міністар фінансаў і кіраўнік Беларускай асацыяцыі гімнастыкі Мікалай Корбут патрабаваў ад спартовай газэты “Прессбол” 70 мільёнаў рублёў, ці больш за 30 тысяч даляраў. Падставай для пазову стаў артыкул журналіста Сяргея Вярсоцкага, у якім сьцьвярджалася, што ў намесьніках міністра — асоба, якую шукае Інтэрпол за ўдзел у арганізаванай злачыннай групоўцы. Як аказалася, грамадзянін Расеі Андрэй Іманалі, пра якога пісаў “Прессбол”, сапраўды, ёсьць намесьнікам Корбута, але ў асацыяцыі гімнастыкі.

4 студзеня суд Цэнтральнага раёну Менску, разгледзеўшы пазоў Мікалая Корбута, пастанавіў спагнаць з рэдакцыі і рэдактара Ўладзімера Беражкова разам 40 мільёнаў рублёў. А напярэдадні судовая калегія Менскага гарадзкога суду пакінула гэтае рашэньне ў сіле. Уладзімер Беражкоў падобны вырак пракамэнтаваў так:

(Беражкоў: ) “Асноўная задача суду — устанавіць ісьціну. А ён нават не зрабіў такой спробы…”

Я паспрабаваў высьветліць: ці задаволены такім рашэньнем Мікалай Корбут? Сам міністар на кантакт не пайшоў, а ў прэсавай службе паведамілі.

(Супрацоўнік: ) “Касацыйную скаргу “Прессбол” падаў, і гэтую скаргу суд не задаволіў. Паводле заканадаўства, прысуд набывае законную сілу на наступны дзень пасьля рашэньня. Аднак сытуацыю вакол грамадзяніна Корбута, які абараніў свае гонар і годнасьць, мы камэнтаваць ня можам”.

Яшчэ да Новага году Мікалай Корбут казаў, што адсуджаныя ў “Прессбола” грошы пойдуць на патрэбы падшэфнага міністэрству калгаса. Аднак падчас апошніх судовых паседжаньняў міністар зьмяніў рашэньне і заявіў, што сродкі яму патрэбныя на лячэньне. Пра гэта кажа Ўладзімер Беражкоў:

(Беражкоў: ) “Корбут забыўся пра калгас, пра калгас ён ужо ня згадваў, а толькі сказаў, што гэта яму на лекі пойдзе…”
XS
SM
MD
LG