ТБІЛІСІ. Прэзыдэнт Грузіі Міхаіл Саакашвілі 10 лютага запрапануе парлямэнту кандыдатуру новага прэм’ер-міністра. Сярод найбольш праўдападобных кандыдатаў на пасаду прэм’ера аналітыкі называюць сьпікера грузінскага парлямэнту Ніно Бурджанадзэ і цяперашняга міністра фінансаў Зураба Нагаідэлі.
Тым часам Злучаныя Штаты накіроўваюць у Грузію экспэртаў з Фэдэральнага бюро расьсьледаваньняў, якія маюць дапамагчы пры высьвятленьні абставінаў нядаўняга выбуху ў Горы і трагічнай сьмерці прэм’ера Зураба Жванія. Паводле афіцыйнай вэрсіі, Жванія стаў ахвяраю няшчаснага здарэньня, атруціўшыся чадным газам.