Лінкі ўнівэрсальнага доступу

Навукоўцы Акадэміі Навук паказалі прыклад непадпарадкаваньня


Галіна Абакунчык, Менск Агульны сход Нацыянальнай Акадэміі навук не зацьвердзіў новага статуту акадэміі, прапанаванага кіраўніцтвам НАН. Навукоўцы называюць гэта адкрытым актам непадпарадкаваньня і пратэсту супраць парушэньня акадэмічных правоў і свабодаў. Акрамя таго, яны заяўляюць пра рашучасьць адстойваць сваю пазыцыю і надалей, а таксама пра намер стварыць рух інтэлігенцыі.

Агульны сход Нацыянальнай Акадэміі навук не зацьвердзіў новай рэдакцыі статуту НАН з прычыны адсутнасьці кворуму. Але многія навукоўцы называюць гэта перамогай, паколькі бальшыня прысутных падтрымала падпісантаў ліста пратэсту супраць дыскрымінацыйнага праекту. Гаворыць адзін з удзельнікаў сходу, член-карэспандэнт Іван Нікітчанка:

(Нікітчанка: ) “Я расцэньваю гэта як добры прыклад. Гэта адкрытыя акцыя непадпарадкаваньня. І калі б усе пайшлі такім шляхам, то не было бы таго, што адбываецца цяпер”.

У новай рэдакцыі статуту было прапанавана ўвесьці ў Акадэміі кантрактную сыстэму, агульным сходам і праз адкрытае галасаваньне абіраць акадэмікаў і членаў-карэспандэнтаў, забараняць навукоўцам займацца палітычнай дзейнасьцю. Кіраўніца прэсавай службы Акадэміі Тацяна Арэшка пракамэнтаваць вынікі сходу адмовілася. Адносна магчымасьці новага разгляду гэтага пытаньня яна паведаміла:

(Арэшка: ) “Наступны агульны сход заплянаваны на красавік, але на парадку дня не стаіць гэтае пытаньне. Але, як сказаў старшыня прэзыдыюму, калі будзе такая патрэба, то, магчыма, і вернемся да гэтага пытаньня”.

У асяродку навукоўцаў розныя меркаваньні адносна таго, ці будзе яшчэ адна спроба прыняць новы статут акадэміі. Спадар Нікітчанка перакананы, што гэтага ня будзе:

(Нікітчанка: ) “Таму што ў “бацькі” ёсьць шмат другіх задачаў — выбары. А памаранчавая рэвалюцыя, яна ж можа перайсьці ў зялёную і пайсьці на поўнач”.

Паводле спадара Нікітчанкі, цяпер навукоўцы працуюць над тым, каб напярэдадні выбараў стварыць рух інтэлігенцыі.

(Нікітчанка: ) “Мы намераныя стварыць моцную арганізацыю з выхадам на студэнцтва і моладзь. Сілы трэба ствараць, бо бязь сілы ж нічога ня будзе”.

Паводле спадара Нікітчанкі, пачатак гэтай працы быў пакладзены яшчэ падчас агульнабеларускага сходу інтэлігенцыі, але цяпер распачынаецца яе новы этап.
XS
SM
MD
LG