Лінкі ўнівэрсальнага доступу

Беларуская апазыцыя разьлічвае на падтрымку новых украінскіх уладаў


Валер Каліноўскі, Менск Якімі будуць дачыненьні новага кіраўніцтва Ўкраіны і Беларусі? На гэтую тэму разважаюць лідэры беларускай апазыцыі, якія сёньня вярнуліся з Кіева, дзе вялі перамовы з прадстаўнікамі новай эліты Ўкраіны.

Новы кіраўнік украінскага ўраду Юлія Цімашэнка не хавала сваіх адносінаў да існага ў Беларусі рэжыму і нават заяўляла, што хацела б перадаць эстафэту дэмакратычнай рэвалюцыі з Украіны ў Беларусь. У прыватнасьці, спадарыня Цімашэнка на прэсавай канфэрэнцыі 26 сьнежня, гаворачы пра будучыя адносіны новага ўкраінскага кіраўніцтва да Беларусі заявіла: “Хацелася б экспартаваць вам троху памаранчавай рэвалюцыі, каб у Беларусі крыху паспрабавалі памаранчавага жыцьця, каб беларускую апазыцыю натхнілі нашыя перамогі і наш досьвед”.

Лідэр Аб’яднанай грамадзянскай партыі Анатоль Лябедзька, які сустракаўся са спадарыняй Цімашэнкай у дзень яе прызначэньня выканаўцай абавязкаў прэм’ера, так ацэньвае магчымасьці рэалізацыі гэтата закліку спадарыні Цімашэнка:

(Лябедзька: ) “Выказвацца ў найбліжэйшы час публічна яна ня будзе, але ў любым выпадку мы ведаем Юлію Цімашэнку як пасьлядоўнага палітыка, і калі яна ставіць пэўныя мэты, яна іх рэалізоўвае. Такім чынам, мы маем добрага саюзьніка на ўзроўні выканаўчай улады Ўкраіны”.

Спадар Лябедзька спадзяецца, што па часе ў Менску зьявіцца новы амбасадар дэмакратычнай Украіны. Тыя паплечнікі Віктара Юшчанкі, зь якімі вялі перамовы Анатоль Лябедзька і Вінцук Вячорка, выказваюць вялікую зацікаўленасьць у дэмакратызацыі Беларусі. Спадар Лябедзька чакае, што Ўкраіна можа паспрабаваць стаць пасярэднікам паміж Захадам і Беларусьсю.

(Лябедзька: ) “У Вярхоўнай Радзе тыя палітыкі, які хутка будуць ва ўрадзе, гавораць, што акрамя ўсяго іншага трэба будзе паспрабаваць усё ж такі ўцягнуць Беларусь як краіну ў эўрапейскія кантакты і камунікацыі. Калі беларуская ўлада ня пойдзе на гэта, то гэтыя кантакты будуць праводзіцца праз грамадзянскую супольнасьць і апазыцыю”.

А старшыня БНФ Вінцук Вячорка мяркуе, што развмову пра экспарт рэвалюцыі з Украіны нельга, затое ўплыў Украіны, асабліва пасьля рэалізацыі амбітных праектаў Віктара Юшчанкі, на беларускае грамадзтва будзе сапраўды значны. З Украіны на Беларусь будзе ісьці магутны інфармацыйны ўплыў, перакананы спадар Вячорка. Штодня Ўкраіну наведваюць сотні і тысячы беларусаў, якія бачаць, што там адбываецца.

Ужо цяпер украінскае кіраўніцтва пашырае кантакты з прадстаўнікамі беларускай апазыцыі, нават на цырымоніі інаўгурацыі прэзыдэнта Юшчанкі прысутнічалі тры апазыцыйныя лідэры — і толькі сьпікер ніжняй палаты Нацыянальнага сходу Ўладзімер Канаплёў быў ад беларускіх уладаў. Паводле Вінцука Вячоркі, калі ў Вярхоўнай Радзе прадстаўлялі спадара Канаплёва, то ўвесь Майдан, які сачыў за ўрачыстасьцямі па тэлеэкранах, асьвістаў прадстаўніка А.Лукашэнкі.
XS
SM
MD
LG