Лінкі ўнівэрсальнага доступу

За што былі асуджаныя муж і сын Галіны Жураўковай?


Алег Грузьдзіловіч, Менск Крымінальныя справы супраць мужа і сына былой кіраўніцы справаў прэзыдэнта Галіны Жураўковай ёсьць формай ціску на яе, падазрае абарона Жураўковай. У чым вінаватыя сваякі Галіны Жураўковай?

Заўтра, 18 студзеня, магчыма, будзе пастаўленая кропка ў працэсе над Галінай Жураўковай — былой кіраўніцай справаў прэзыдэнта, якую падазраюць у крадзяжы больш як 3 мільёнаў даляраў праз службовыя злоўжываньні. Галіна Жураўкова была арыштаваная разам з сынам і мужам і, паводле яе адвакатаў, адчувала сябе закладніцай. “Жураўкова зразумела, што толькі ад яе залежыць, ці выйдуць на волю муж і сын”, — заявіў у судовых спрэчках адвакат Жураўковай Алег Дубавец.

Менавіта гэтай заклапочанасьцю пра лёсы блізкіх адвакат патлумачыў тое, што на допытах у КГБ Жураўкова прызнавалася вінаватай у атрыманьні незаконных грошай і вярнула ў казну больш як паўтара мільёна даляраў. Вось што на працэсе адвакат казаў пра гэтыя грошы:

(Дубавец: ) “Так, гэтыя грошы пазычаліся, каб кампэнсаваць страты. Кампэнсаваць страты, каб выйсьці на волю. Выйсьці на волю, каб дапамагчы мужу і сыну”.

На судзе Жураўкова цалкам адмовілася ад ранейшых паказаньняў. Чым займаліся муж і сын Жураўковай і ці маюць яны дачыненьне да яе крамінальнай справы?

Летась на пачатку сьнежня прадпрымальнік Уладзімер Жураўкоў, муж Галіны Жураўковай, даваў паказаньні на працэсе над ёю ў якасьці сьведкі. На судзе было абвешачана, што Жураўкоў знаходзіцца пад сьледзтвам паводле іншай крымінальнай справы — за нявыплату падаткаў. Гэтая гісторыя пачалася анэкдатычна. Яшчэ ў 2001 годзе ў Чавусах, падчас будаўніцтва на зямельным участку, які належаў Уладзімеру Жураўкову, быў знойдзены шкляны слоік, а ў ім — 65 тысяч даляраў. Будаўнікі ўжо пасьпелі падзяліць грошы, калі знайшоўся іх гаспадар — Уладзімер Жураўкоў. Грошы яму вярнулі, але міліцыя пасьпела пачаць разьбіральніцтва. Пра дакумэнты той справы сьледчыя згадалі амаль праз тры гады, калі затрымалі Галіну Жураўкову. Яе мужа абвінавацілі ва няўплаце падаткаў і неўзабаве асудзілі на тры гады зьняволеньня. Сувязі гэтай справы са справай Галіны Жураўковай сьледчыя не знайшлі.

Пры канцы 2004 году Маскоўскім судом Менску быў асуджаны і прыёмны сын Жураўковай Віталь Пахомаў. Яго прызналі вінаватым у шэрагу эканамічных злачынстваў, сярод якіх незаконная прадпрымальніцкая дзейнасьць, нявыплата падаткаў, нанясеньне маёмасных стратаў. У тым ліку суд высьветліў, што камэрцыйная фірма, якой валодаў Віталь Пахомаў, незаконна набывала аўтамабілі праз крамы канфіскаваных тавараў, якія падпарадкаваныя кіраўніцтву справаў прэзыдэнта. Аднак і ў дадзеным выпадку прамой сувязі са справай Галіны Жураўковай сьледзтва не знайшло. Прыёмны сын Жураўковай Віталь Пахомаў быў асуджаны на тры гады зьняволеньня.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG