Лінкі ўнівэрсальнага доступу

Чаму вырасьлі наклады дзяржаўных газэтаў?


Галіна Абакунчык, Менск Міністар інфармацыі Ўладзімер Русакевіч заявіў, што паводле вынікаў падпісной кампаніі на першае паўгодзьдзе 2005 году наклады дзяржаўных газэтаў вырасьлі на 25%. Адначасна ў Беларускай асацыяцыі журналістаў сьведчаць пра факты адміністрацыйных захадаў дзеля павелічэньня накладу дзяржаўных выданьняў і пра перашкоды пры падпісцы на незалежныя газэты.

Паводле афіцыйнай інфармацыі, асабліва ўдала падпіска склалася для газэты “Советская Белоруссия”: наклад выданьня перасягнуў 500-тысячную мяжу. Пракамэнтаваць гэткі посьпех у рэдакцыі “СБ” адмовіліся: намесьнік галоўнага рэдактара Анатоль Лябедзік у адказ на пытаньне Радыё Свабода кінуў слухаўку. А вось што паведаміла пра вынікі нядаўняй падпіскі загадчыца пошты ў вёсцы Бор Пухавіцкага раёну Валянціна Семяняка:

(Семяняка: ) “У нашым аддзяленьні плян быў 490, а мы выпісалі 512 асобнікаў. У асноўным такія газэты, як “Советская Белоруссия”, “Пухавіцкія навіны”, “Мінская праўда”. І жывёлаводы, і даяркі, і спэцыялісты — усе падпісаныя ў нас”.

Паводле маніторынгу Беларускай асацыяцыі журналістаў, разнарадкі на дзяржаўныя газэты даведзеныя ня толькі ўсім гарадзкім ды вясковым поштам, але таксама дзяржаўным і прыватным прадпрыемствам, навучальным установам. У адпаведных лістах кіраўнікі адміністрацыяў розных узроўняў пры гэтым спасылаюцца на распараджэньне адміністрацыі прэзыдэнта. Гаворыць сябра Беларускай асацыяцыі журналістаў Вольга Бабак:

(Бабак: ) “У БАЖ патрапілі некалькі дакумэнтаў, якія сьведчаць пра вельмі актыўнае выкарыстаньне адміністрацыйнага рэсурсу. Як правіла, яны абавязваюць прадпрыемствы і арганізацыі падпісацца на пэўную колькасьць пэўных дзяржаўных газэтаў і зрабіць справаздачу аб праведзенай працы. У некаторых з гэтых папераў патрабуецца не дапусьціць падпіскі на недзяржаўныя газэты. Да прыкладу, на “Народную волю”, “Белорусский рынок”, “Белорусскую газэту”, “Известия”, нават “Комсомольскую правду”.

Адмыслоўцы у справах мэдыяў заяўляюць, што падвышэньне накладаў дзяржаўных газэтаў на 25% і 500-тысячная падпіска на “Советскую Белоруссию” — вынік выкананьня адмысловага распараджэньня кіраўніка краіны ад сакавіка 2003 году, у якім, у прыватнасьці, гаворыцца: “Рэдакцыі газэты “Советская Белоруссия” забясьпечыць у 2004–2005 гадах павелічэньне накладу да 500 тысяч асобнікаў”. Вось што сказала ў інтэрвію “Свабодзе” намесьніца галоўнага рэдактара незалежнай газэты “Народная воля” Сьвятлана Калінкіна:

(Калінкіна: ) “Калі б чытачы добраахвотна падпісваліся на дзяржаўныя выданьні, то не было б ніякіх дадатковых загадаў на гэты конт. Але я хачу зьвярнуць увагу на тое, што сёлета асабліва настойліва чытачоў прымушалі падпісвацца менавіта на “Советскую Белоруссию”. Мне падаецца, што гэта можа азначаць, што газэта будзе ўключаная ў некую буйную палітычную кампанію ў 2005 годзе. Магчыма, гэта прэзыдэнцкія выбары ці нешта кшталту гэтага”.

Адмыслоўцы сьведчаць пра ўзрастаньне ролі адміністрацыйнага рэсурсу ў справе павелічэньня накладаў дзяржаўных газэтаў і стварэньне перашкодаў для дзейнасьці незалежных мэдыяў. Тым ня менш, нават у гэткіх умовах, наклад незалежнай “Белорусской деловой газеты” ў новым паўгодзьдзі ня зьменшыўся і застаўся ў межах 10 тысяч асобнікаў, гэткае ж становішча ў “Белорусским рынку”. У “Белорусской газете” і “Народнай волі” колькасьць падпісчыкаў нават павялічылася на тысячу чалавек — з 19 да 20 тысяч і з 28 да 29 тысяч адпаведна.
XS
SM
MD
LG