Лінкі ўнівэрсальнага доступу

Міністэрства інфармацыі адмовіла гарадзенскай газэце “Биржа информации”


Міхал Карневіч, Горадня Сёньня споўніўся месяц, як на загад міністра інфармацыі прыпыненая дзейнасьць гарадзенскай газэты “Биржа информации” тэрмінам на тры месяцы. Якраз у гэты дзень рэдакцыя атрымала ліст ад намесьніка міністра Л. Ананіч, у якім паведамляецца, што ў міністэрства адсутнічаюць падставы для адмены загаду аб прыпыненьні дзейнасьці выданьня.

Адразу пасьля рашэньня міністра, рэдактарка Алена Раўбецкая зьвярнулася да яго з просьбай зьменшыць тэрмін прыпыненьня дзейнасьці газэты.

Яна матывавала свой зварот тым, што рашэньне суду, на падставе якога прыпынілі газэту, датычыла яе асабіста як фізычнай асобы, а не рэдакцыі. (Нагадаю, што яе абвінавацілі ў распаўсюджваньні зьвестак, якія быццам абражаюць гонар і годнасьць прэзыдэнта ў артыкуле “Здрада імем народа”). І па рашэньні суду яна выплачвае штраф. Выходзіць, што за адно і тое парушэньне пакаралі двойчы.

Намесьнік міністра Л.Ананіч у сваім адказе сьцьвярджае, што прымененыя розныя віды адказнасьці і да розных асобаў. Паўстае лягічнае пытаньне: за што ж тады пакаралі ўвесь калектыў рэдакцыі?

Тым ня менш, на працягу месяца газэта штотыдзень зьяўляецца ў інтэрнэт-вэрсіі. Рэдакцыя атрымлівае мноства водгукаў на сваім сайце. Працуе і рэклямны аддзел выданьня, але настрой, як заўважаюць супрацоўнікі рэдакцыі, не працоўны.

Вось што кажа галоўная рэдактарка “Биржи информации” Алена Раўбецкая:

(Раўбецкая: ) “Ніякага іншага адказу зь міністэрства інфармацыі я не чакала, ня гледзячы на тое, што лісты былі накіраваныя ня толькі мною асабіста, але і сотнямі гарадзенцаў… На двары Каляды, але ў рэдакцыі ніхто сьвята ня адчувае. Для нас сьвята – выдаваць газэту. Тым ня менш, калектыў трымаецца, сілы, каб не разьбягацца, пакуль ёсьць…”
XS
SM
MD
LG