Лінкі ўнівэрсальнага доступу

logo-print

Цытаты мінулага – 21 сьнежня


Падрыхтаваў Зьміцер Падбярэскі Беларуская прэса розных гадоў 21 сьнежня.

“Сталинская молодежь”, 1954 год:

“Працоўныя рэспублікі адзначаюць 75 год з дня нараджэньня вялікага прадаўжальніка справы Леніна, выдатнага тэарэтыка марксізму-ленінізму — Іосіфа Вісарыёнавіча Сталіна. На прадпрыемствах, у дзяржаўных і навучальных установах Менску, Віцебску, Гомлі, Горадні й іншых гарадах, у калгасах і машына-трактарных станцыях адбываюцца гутаркі пра жыцьцё і дзейнасьць І.В.Сталіна, чытаюцца лекцыі і даклады. У Дзяржаўнай бібліятэцы БССР імя У.І.Леніна адкрылася выстава літаратуры, прысьвечаная 75-годзьдзю з дня нараджэньня І.В.Сталіна. На ёй прадстаўлены працы І.В.Сталіна”.

“Вечерний Минск”, 1974 год:

“Асабліва бязьлітасна высякаюць пасадкі елак у пераднавагоднія дні. Сёлета работнікам лясной аховы лесапаркавай гаспадаркі будуць дапамагаць атрады дружыньнікаў, міліцыя, школьныя лясьніцтвы й іншыя грамадзкія арганізацыі гораду і раёну. Няхай не разьлічваюць “паляўнічыя за рублём”, што яны здолеюць беспакарана нішчыць лясныя масівы. За кожную сьсечаную елку ім давядзецца заплаціць штраф ад 3 да 26 рублёў. Аб правіннасьці высекачоў зробіцца вядомым па месцы іх працы, дзе да іх прымуць адміністрацыйныя меры. Захаваем нашыя лясы ад высекачоў!”

“Народная газета”, 1994 год. Мікалай Галко з парлямэнту аб антыкарупцыйным дакладзе Сяргея Антончыка:

“Учора ў зале Вярхоўнага Савету з самай раніцы не было свабодных месцаў: усе ложы запоўнены, у праходах — мноства людзей з тэлекамерамі, з блакнотамі і без нічога… Перад абедзенным перапынкам выступіў Прэзыдэнт Аляксандр Лукашэнка. Пра абвінавачванне ў незаконным фінансаванні выбараў ён сказаў лаканічна: калі дакажаце віну — пайду ў адстаўку. А пра бліжэйшых паплечнікаў — што верыць ім… У цэлым гэта быў не лепшы дзень у парляменцкай гісторыі. Шуму, як мне здалося, нарабілі шмат, а якім будзе вынік, дагадацца няцяжка. Бомба, выпушчаная апазіцыяй, магчыма, нанясе некаторую шкоду прэзыдэнцкаму караблю, але не патопіць”.
XS
SM
MD
LG