Лінкі ўнівэрсальнага доступу

Працягваецца канфлікт між старшынём “Народнай грамады” Міколам Статкевічам і некалькімі ягонымі намесьнікамі


Альгерд Невяроўскі, Менск Намесьнікі старшыні Беларускай сацыял-дэмакратычнай партыі “Народная грамада” Ўладзімер Нісьцюк, Юры Маркоўскі, а таксама старшыня Цэнтральнай рэвізійнай камісіі Мікалай Усьціменка заяўляюць, што нядаўняе рашэньне аб выключэньні іх з партыі — незаконнае. А рашэньне менскага гаркаму аб выключэньні з БСДП старшыні Міколы Статкевіча, наадварот, называюць абсалютна легітымным. Сам старшыня партыі гаворыць, што цяпер яго мала цікавяць заявы людзей, якія ўжо ня ёсьць сябрамі “Народнай грамады”.

Уладзімер Нісьцюк, Юры Маркоўскі, Мікалай Усьціменка, а таксама кіраўнікі менскіх гарадзкой і абласной арганізацыяў “Народнай грамады” Міхаіл Ганчарык і Канстанцін Мароз склікалі 16 сьнежня прэсавую канфэрэнцыю і распавялі, што цяпер адбывацца ў іхнай партыі. Уладзімер Нісьцюк гаворыць, што прырода канфлікту мае этычны, палітычны й прававы аспэкты.

Ён сьцьвярджае, што Мікалай Статкевіч гаворыць няпраўду, калі абвінавачвае яго і ягоных калегаў у працяглай нявыплаце сяброўскіх складак і ў нежаданьні ўдзельнічаць у выбарах. Уладзімер Нісьцюк і яго калегі абвінавачваюць Міколу Статкевіча ў таемных перамовах зь лідэркай партыі жанчын “Надзея” Валянцінай Матусэвіч і старшынём грамадзкага аб’днаньня “Пэрспэктыва” Анатолем Шумчанкам аб стварэньні новай сацыял-дэмакратычнай партыі за сьпіной сябраў ЦК “Народнай грамады”. Статкевіча таксама вінавацяць у прысваеньні партыйнай маёмасьці, стварэньні нелегітымных органаў і грубых парушэньнях статуту.

За гэта менскі гаркам БСДП 11 сьнежня і выключыў яго з партыі. Але трыма днямі раней менская гарадзкая партканфэрэнцыя выключыла з партыі спадара Нісьцюка і ягоных калегаў. Абодва бакі канфлікту называюць рашэньні сваіх апанэнтаў незаконнымі. І Мікола Статкевіч, і група Ўладзімера Нісьцюка сьцьвярджаюць, што большасьць сяброў партыі падтрымліваюць менавіта іх. Гаворыць намесьнік старшыні БСДП Юры Маркоўскі:

(Маркоўскі: ) “Склалася так, што Мікалая Віктаравіча на сёньняшні дзень падтрымліваюць самыя слабаразьвітыя абласныя арганізацыі ў нашай партыі”.

Уладзімер Нісьцюк лічыць, што выйсьце з канфлікту можа быць знойдзенае на нечарговым зьезьдзе, прызначаным на 15 студзеня:

(Нісьцюк: ) “Я думаю, што выйсьці можна з гэтага канфлікту, каб у партыі ўсё засталося сумленна, і захаваць твар — толькі на зьезьдзе. Мне бачыцца, што ў Мінюсту няма падставаў цяпер не прызнаць законнымі дзеяньні нашых органаў, якія цяпер працуюць”.

Старшыня партыі Мікола Статкевіч гаворыць, што большасьць сяброў БСДП падтрымліваюць менавіта яго. Гаворыць Мікола Статкевіч:

(Статкевіч: ) “Партыя застаецца адзінай, партыя выконвае рашэньні зьезду аб аб’яднаньні зь іншымі левацэнтрысцкімі сіламі, а ўсё, што адбываецца цяпер за межамі партыі, гэта ўсё мы ўспрымаем як гістэрыку прайгралых”.

Мікола Статкевіч не зьбіраецца прызнаваць легітымнасьці зьезду, прызначанага ягонымі апанэнтамі.
XS
SM
MD
LG