Лінкі ўнівэрсальнага доступу

logo-print

Полаччына: калі заробкі настаўнікам ня будуць выплачаныя ў поўным аб’ёме, яны могуць спыніць працу ад 23 сьнежня


Вінцэсь Мудроў, Полацак У Полацкім раёне затрымліваюць выплату заробку настаўнікам вясковых школаў. Прычым, праблемы гэтыя пачаліся адразу па рэфэрэндуме.

Учора ўвечары я сустрэўся з настаўнікам аднае з такіх школаў – па просьбе суразмоўцы прозьвішча яго не называю – і вось што пачуў з настаўніцкіх вуснаў:

(Настаўнік: ) “У лістападзе затрымка выплаты заработнай платы настаўнікам нашага рэгіёна была шаснаццаць дзён. У гэтым месяцы таксама настаўнікі нашыя не атрымалі своечасова зарплаты. Ужо сярэдзіна сьнежня, а мы не атрымалі авансу, і ня ведаем, і ніхто нам ня можа сказаць канкрэтна – калі атрымаем гэтыя грошы”.

Мушу заўважыць, што праблемы з выплатай заробку зазналі й настаўнікі сумежных раёнаў. Чым тлумачыцца падобная сытуацыя? На пастаўленае пытаньне, ізноў такі, адкажа мой суразмоўца:

(Настаўнік: ) “Ушацкі раён, Шумілінскі, Полацкі, Верхнядзьвінскі – гэтыя раёны знаходзяцца на датацыі. І нам тлумачаць тым, што своечасова не пералічваецца датацыя з абласнога бюджэту, таму ідзе такая затрымка па заработнай плаце”.

Трэба адцеміць, што работнікі гарадзкіх школаў такіх праблемаў ня маюць. І мой суразмоўца выказаў наконт такога стану рэчаў пэўныя думкі, да якіх варта прыслухацца.

(Настаўнік: ) “Мы ведаем, што нашыя сябры-настаўнікі, якія працуюць у Полацку й Наваполацку, своечасова атрымліваюць заробак, бо бюджэт гарадоў вельмі моцны. Жывем мы ўсе ў адной дзяржаве, а бюджэты ў нас, атрымліваецца, зусім розныя. А павінен быць адзін бюджэт – і для настаўніка, і для доктара, незалежна ад таго, дзе жывеш – ці ў вёсцы, ці ў горадзе”.

А што канкрэтна кажуць полацкія раённыя ўлады, як яны зьбіраюцца выпраўляць сытуацыю? Я размаўляў з загадчыкам аддзела адукацыі Полацкага райвыканкаму Мікалаем Максімавым, і той паведаміў, што запазычанасьць па выплаце заробку настаўнікам склала па раёну 600 мільёнаў рублёў. Па сьведчаньні спадара Максімава, выплаты ўжо пачаліся. Аднак, заўважым ад сябе, не паўсюдна і ня ўсім адразу. З тае нагоды настаўнікі шэрагу школ пішуць зараз калектыўныя лісты ў аблвыканкам, а таксама гучаць патрабаваньні спыніць ад 23 сьнежня працу, калі заробкі ня будуць выплачаныя ў поўным аб’ёме.
XS
SM
MD
LG