Лінкі ўнівэрсальнага доступу

Кіроўца “Audi A6” спрабаваў правезьці 30,000 даляраў празь літоўска-беларускую мяжу


Тацяна Поклад, Вільня Літоўскія памежнікі затрымалі віленчука, які спрабаваў нелегальна правезьці празь літоўска-беларускую мяжу болей за 30 тысячаў даляраў.

Літоўская дзяржаўная служба аховы мяжы паведаміла сёньня пра канфіскацыю надзвычай вялікай сумы грошаў пра спробе перавезьці іх зь Літвы ў Беларусь нелегальна.

33-гадовы віленчук на легкавым аўтамабілі “Audi A6” учора ўвечары на прапускным пункце ў Медніках накіраваўся адразу на “зялёную” паласу, – гэта азначала, што ён ня вязе ні тавараў, ні грошаў, якія трэба дэкляраваць.

Ужо па-за зонай мытнага кантролю машыну спынілі супрацоўнікі апэратыўнага аддзелу Літоўскай службы аховы мяжы. У часе паўторнай праверкі віленчук сам выцягнуў з унутранай кішэні курткі стос даляраў. Там было ў дзесяць разоў болей грошаў, якія можна правозіць праз мяжу бяз дэклярацыі. 30,500 амэрыканскіх даляраў былі канфіскаваныя, а сам віленчук затрыманы на два дні, распачатае дасудовае расьсьледаваньне ў справе кантрабанды грошаў. Паводле існуючых правілаў, ягонае імя і нацыянальнасьць пакуль не паведамляецца.

Паводле новых дзейных законаў, выяжджаючы зь Літвы ў краіны, якія не належаць да Эўразьвязу альбо прыяжджаючы з такіх краінаў, неабходна падаваць пісьмовую дэклярацыю пра грошы гатоўкай, калі іх агульная сума перавышае 10 тысяч літаў (3 тысячы эўра).
XS
SM
MD
LG