Лінкі ўнівэрсальнага доступу

Апазыцыя болей ня хоча весьці перамовы з Кучмам?


Валер Каліноўскі, Кіеў Леанід Кучма не жадае ісьці на саступкі апазыцыі, ня хоча выконваць рашэньні Вярхоўнай Рады аб адстаўцы кабінэту Януковіча, які спрычыніўся да масавых фальсыфікацыяў, што было прызнана Вярхоўным судом. Зыходзячы ў гісторыю як другі прэзыдэнт Украіны, Леанід Кучма імкнецца пераўтварыць Украіну ў парлямэнцкую рэспубліку, забраць паўнамоцтвы ў свайго наступніка. Прадстаўнікі штабу Юшчанкі кажуць, што болей няма сэнсу весьці перамовы зь Леанідам Кучмам, а актывісты аб’яднаньня “Пора” пікетуюць загарадную дачу Кучмы.

Трэці раўнд перамоваў Віктара Юшчанкі з прадстаўнікамі старой улады за міжнародным пасярэдніцтвам, які скончыўся сёньня ўначы, меў вынікам рашэньне, якое Кучма завізаваў з агаворкамі і, відаць, не зьбіраўся выконваць:

(Кучма: ) “Бакі дайшлі да згоды пра неабходнасьць ўнясеньня зьменаў у закон аб выбарах прэзыдэнта, якія б прадугледжвалі мэханізм празрыстых і сумленных выбараў, рабілі б немагчымым злоўжываньні й фальсыфікацыі”.

Намесьнік старшыні парлямэнту, кіраўнік выбарчай кампаніі Юшчанкі Аляксандр Зінчанка пасьля апошняга раўнду круглага стала прыйшоў да высновы, што весьці перамовы з Кучмам не эфэктыўна і бескарысна.

Ён назваў круглыя сталы марнаваньнем часу, калі трэба рашуча дзейнічаць. Яшчэ з больш радыкальнымі заявамі выступае грамадзкая ініцыятыва “Пора”, яна заклікае адмовіцца ад перамоваў і ціснуць на Кучму іншымі сродкамі, у прыватнасьці, актывісты арганізацыі праводзяць шумныя пікетаваньні загараднай рэзыдэнцыі Леаніда Кучмы ў Конча-Засьпе.

Простыя актывісты аранжавай рэвалюцыі таксама ня лічаць патрэбным весьці перамовы з Кучмам.

(Спадар: ) “З бандытамі трэба размаўляць іхнай мовай. Яму прапанавалі – ён ня хоча, значыць, трэба дзейнічаць іначай, да яго трэба прымяняць сілу альбо іншыя мэтады, калі ён не хоча добраахвотна выконваць свае абавязкі”.

(Спадарыня: ) “Мы лічым, што абсалютна няма ніякага сэнсу весьці перамовы з Кучмам, таму што ў прынцыпе ягоны тэрмін закончыўся, трэба яго проста ставіць да ведама і прымушаць падпісваць умовы, ён злоўжывае цярпеньнем украінскага народу, і гэта ўсё для яго можа дрэнна закончыцца”.

Аднак іншыя людзі лічаць патрэбным весьці перамовы з Кучмам, бо яму пакуль падпарадкоўваюцца ўзброеныя сілы і МУС.

Тым часам Віктар Януковіч, які ўчора пайшоў у адпачынак, вырашыў памяняць імідж перад другім турам галасаваньня 26 сьнежня і заявіў, што ён прадстаўляе новую ўладу.

(Януковіч: ) “Высновы рабіць грамадзянам: Януковіч новы кандыдат новай улады ці старой. А Юшчанка я перакананы – гэта спроба рэваншу старой улады, улады былой”.

Выбарчы штаб Януковіча ўзначаліў Тарас Чарнавол. Сьцяпан Гаўрыш, былы прадстаўнік Януковіча ў ЦВК, пакінуў ягоную каманду, бо лічыць удзел Януковіча ў выбарах немэтазгодным.
XS
SM
MD
LG