Лінкі ўнівэрсальнага доступу

На чым будць эканоміць беларусы, каб аплачваць камунальныя паслугі па новых тарыфах?


Альгерд Невяроўскі, Менск Ад 1 сьнежня рашэньнем ураду плата за тэхнічнае абслугоўваньне кватэраў падвышаная больш як на 22%. На чым будуць людзі эканоміць, каб аплаціць гэтыя камунальныя паслугі? Такое пытаньне мінакам на менскіх вуліцах задаваў наш карэспандэнт.

(Карэспандэнт: ) “Ад 1 сьнежня плата за тэхнічнае абслугоўваньне кватэраў падвышаная больш як на 22%. Скажыце, на чым вы зьбіраецеся эканоміць, каб аплачваць гэтыя камунальныя паслугі?”

(Спадарыня: ) “Ну вядома ж, на ежы. А на чым? На ежы. На чым яшчэ эканоміць, ужо больш няма на чым. Мы вельмі мала атрымліваем грошай, у нас малыя заробкі. І ўсё гэта вельмі цяжка, зімой вельмі цяжка. А што зробіш? Наш народ ня выйдзе на вуліцы й ня будзе там мітынгаваць”.

(Пэнсіянэрка: ) “Гэта вельмі цяжкае пытаньне. На харчаваньні. Пэнсіі ўзрастаюць на 20%, а цэны на 30%. З кожным падвышэньнем толькі горш і горш становіцца”.

(Спадар: ) “Я ня ведаю, я дастаткова зарабляю”.

(Пэнсіянэр: ) “На ўсім я эканомлю, на ўсім без выключэньня. І не шыкоўна жыву”.

(Пэнсіянэр: ) “На харчаваньні, больш няма на чым”.

(Спадарыня: ) “Добрае пытаньне! Я буду намагацца зарабіць у іншым месцы, акрамя маёй асноўнай работы”.

(Спадарыня: ) “Напэўна, на ежы, таму, што больш няма на чым эканоміць, і так на ўсім эканомім”.

(Карэспандэнт: ) “А як вы ўвогуле ставіцеся да гэтых падвышэньняў?”

(Спадарыня: ) “Ну як можна ставіцца да гэтых падвышэньняў? Адмоўна”.

(Спадар: ) “Відаць, буду эканоміць на электрычнасьці і, хутчэй за ўсё, на вадзе. Гэта асноўныя паслугі, плату за якія можна рэальна зьнізіць, калі да гэтага пытаньня падысьці рацыянальна. А так з гэтымі камунальнымі паслугамі бяда”.

(Спадарыня: ) “Асабліва эканоміць ня буду. Проста буду плаціць — колькі б ні вымагалі”.

(Спадар: ) “Верагодней за ўсё, прыйдзецца ашчаджаць на прадуктах харчаваньня”.

(Спадар: ) “Ну пэўна ж, на прадуктах. На чым яшчэ эканомяць нашыя людзі? На прадуктах, на дзецях, на малацэ, на адзеньні, на кнігах”.

(Спадарыня: ) “Я думаю, больш за ўсё на вадзе, бо ў нас стаяць лічыльнікі, і на электрычнасьці”.

(Дзяўчына: ) “Я не аплачваю камунальных паслугаў, таму гэта не мае праблемы”.

(Спадар: ) “На чым зьбіраемся эканоміць? Вы ведаеце, нават ня ведаю, няма на чым эканоміць. Трэба лепш, каб урад эканоміку падымаў”.

(Спадар: ) “На ежы, а на чым яшчэ застаецца? Вельмі дрэнна стаўлюся да гэтага падвышэньня. Але я ня п’ю, не палю, тама няма на чым эканоміць”.
XS
SM
MD
LG