Лінкі ўнівэрсальнага доступу

Варшава хоча самастойна кантактаваць зь Менскам


Аляксей Дзікавіцкі, Варшава Польшча настойвае на ўнясеньні зьменаў у праект рэзалюцыі Эўразьвязу ў справе Беларусі, якая мусіць быць ухваленая сёньня ў Брусэлі.

Дакумэнт, сярод іншага, прадугледжвае, што краіны-сябры Эўразьвязу ў кантактах зь Менскам можа прадстаўляць выключна краіна, якая кіруе ў дадзены момант Аб’яднанай Эўропай, высокі прадстаўнік Эўразьвязу ў міжнародных справах, альбо Эўрапейская Камісія.

Варшава хоча дамагчыся права самастойна кантактаваць зь беларускімі чыноўнікамі, бо гэта, паводле польскіх уладаў, “неабходна для памежнага супрацоўніцтва” і “каб не пакінуць шматтысячную польскую меншасьць у Беларусі сам-насам са сваімі праблемамі”.

Міністар замежных справаў Польшчы Влодзімеж Цімашэвіч заявіў, што будзе пераконваць сваіх калегаў у Эўразьвязе, каб Брусэль больш актыўна супрацоўнічаў зь беларускімі недзяржаўнымі арганізацыямі, бо такое супрацоўніцтва дае шанец на дэмакратычныя перамены ў Беларусі.

Як паведамляецца, у часе сёньняшняй сустрэчы у Брусэлі кіраўнік польскай дыпляматыі мае намер запрапанаваць таксама адкрыцьцё прадстаўніцтва Эўрапейскай камісіі ў Менску.

Між тым некаторыя польскія газэты пішуць сёньня, што Эўразьвяз абавязкова пашырыць кола асобаў, якім будзе забаронены ўезд на тэрыторыю Аб’яднанай Эўропы, але сярод гэтых асобаў напэўна ня будзе Аляксандра Лукашэнкі.
XS
SM
MD
LG