Лінкі ўнівэрсальнага доступу

Пазьняк расказаў пра Каліноўскага, Касьцюшку, Слуцкае паўстаньне ў эфіры і на наступны дзень яго звольнілі з працы


Алег Грузьдзіловіч, Менск Нядаўна карэспандэнт Сеньнінскага раённага радыё Алесь Пазьняк выпусьціў у эфір перадачу апазыцыйнага зьместу. Чаму “ўзбунтаваўся” журналіст дзяржаўнага радыё, чым гэта для яго скончылася і што пра ягоны ўчынак думаюць жыхары Сянно, высьвятляў наш карэспандэнт.

21-гадовы Алесь Пазьняк зараз адзін з самых вядомых у Сянно людзей:

“А-а-а, гэта ж наш бунтар – камікадзэ” – сказала апэратарка службы даведкі Сянно і адразу дала хатні тэлефон журналіста.

Алесь распавёў, што зь ім адбылося. У перадапошні дзень кастрычніка Сеньнінскае раённае радыё, як ранейшыя два гады, у апошні раз загучала ягоным голасам. Толькі замест звыклага рэпартажу з палеткаў ці фэрмаў карэспандэнт пачаставаў сваіх слухачоў незвычайнай лекцыяй.

(Пазьняк: ) “Пачаў з таго, што 25 жніўня 1991 году Беларусь набыла незалежнасьць, спыніўся на эканамічных прыярытэтах Беларусі, згадаў Касьцюшку, Каліноўскага, герояў Слуцкага паўстаньня, тых, хто выйшаў бараніць Беларусь і скончыў заклікам падымацца з каленаў, наперад – за волю, за незалежнасьць”.

Праз два дні Алесь Пазьняк даведаўся, што яго звольнілі з працы. Малады чалавек кажа, што звальненьне пазначылі заднім чыслом, каб атрымалася, што ў эфір ён выйшаў незаконна. Але, паводле журналіста, гэты быў заплянаваны эфір, толькі зьмест незвычайны.

“Больш ня мог цярпець дзяржаўнае хлусьні. У Сянно няма свабоды друку. Мяне, як журналіста, прыціскалі.”– патлумачыў свой учынак Алесь Пазьняк.

У якасьці прыкладу ён распавёў пра тое, як падчас выбарчай кампаніі яго прымушалі прапагандаваць за афіцыйнага кандыдата, а пра незалежных інфармацыі не было.

Начальнік Алеся Пазьняка, рэдактар мясцовай газэты Міхал Бялоў дае сваю вэрсію здарэньня. Паводле спадара Бялова, карэспандэнт Пазьняк напярэдадні прагуляў два працоўных дні, а калі яго папярэдзілі аб звальненьні, фактычна пайшоў на незаконны захоп радыёвузла.

(Бялоў: ) “Інакш не магу назваць гэты ўчынак як радыёхуліганствам. Бо ён быў звольнены з працы за прагулы яшчэ 29-га чысла”.

Што да несправядлівага разьмеркаваньня эфірнага часу паміж кандыдатамі ў дэпутаты, паводле Міхала Бялова незалежныя кандыдаты самі не рваліся ў эфір.

Што думаюць жыхары Сянно пра ўчынак маладога журналіста?

Паводле Алеся Пазьняка, цягам трох дзён пасьля незвычайнай перадачы ягоны тэлефон ня меў адпачынку ад званкоў і сярод водгукаў не было ніводнага адмоўнага. Усе віталі, прапаноўвалі дапамогу альбо выказвалі спачуваньні з прычыны будучых дрэнных наступстваў.

Але пакуль акрамя звальненьня з працы нічога з Алесем Пазьняком не адбылося, і ён дагэтуль адчувае незвычайны душэўны ўздым.

(Пазьняк: ) “Сёньня я сябе адчуваю птушкай вольнай, пакуль што. Якая ні чым не абцяжараная, якая скінула з сябе ўвесь баляст”.

Днямі рэдактара газэты “Голас Сеньніншчыны” Міхала Бялова выклікалі па тлумачэньні да абласнога начальства. Ці ўжо скончылася для яго гэтая гісторыя, рэдактар раёнкі ня ведае.
XS
SM
MD
LG