Лінкі ўнівэрсальнага доступу

Беларускія адстаўныя афіцэры едуць наёмнікамі ў Афрыку з-за сваёй беднасьці


Валер Каліноўскі, Менск Магчымасьць зарабіць ад адной да некалькіх тысяч даляраў у месяц падштурхоўвае адстаўных беларускіх афіцэраў ехаць у нестабільныя краіны Афрыкі ў якасьці спэцыялістаў, авіямэханікаў і пілётаў. Інцыдэнт у Кот д’Івуары мала адаб’ецца на гэтым бізнэсе, кажуць адстаўныя афіцэры.

У беларускіх вайсковых гарадках зайздросьцяць тым адстаўнікам, якім удалося зарабіць у краінах Афрыкі прыстойныя грошы і такім коштам вырашыць праблемы з жыльлём альбо нават арганізаваць маленькі ўласны бізнэс.

У афрыканскія краіны пастаўлялася раней і прадаецца цяпер старая савецкая тэхніка. Паміж тымі, хто жадае яе абслугоўваць, застаецца вялікая канкурэнцыя, нават сярод прадстаўнікоў розных краінаў — вялікую цікавасьць да гэткага бізнэсу ў Афрыцы выявілі былі баўгары, але ўсё ж расейцы зь беларусамі іх апярэдзілі.

Арганізоўваюць групы вайсковых спэцыялістаў расейскія фірмы, набліжаныя да “Рособоронэкспорту”. Дзейнічаюць яны легальна, у інтэрнэце можна знайсьці іх аб’явы аб наборы спэцыялістаў. Яны і фармуюць групы на 12–15 чалавек, якія час ад часу мяняюцца. Беларускія вайсковыя пэнсіянэры ўжо асвоілі маршруты ў Альжыр, Кот д’Івуар, Уганду, іншыя краіны. Найбольшым попытам там карыстаюцца авіямэханікі й пілёты.

Праца бывае і небясьпечная, — гаворыць адзін зь беларускіх адстаўнікоў, які рыхтуецца да паездкі ў Афрыку:

(Адстаўны афіцэр: ) “Безумоўна, небясьпечная, ступень небясьпекі большая, чым у нас, таму што там многіх расходных матэрыялаў няма. Адсутнічаюць і сродкі аб’ектыўнага кантролю, якія вядуць запіс парамэтраў палётаў”.

Акрамя таго, падвышаюць небясьпеку ўнутраныя канфлікты і войны, якія часам вядуцца ў гэтых нестабільных краінах. Але рызыка і дадаткова аплачваецца.

Найбольш небясьпечная праца ў пілётаў рэактыўных самалётаў і верталётаў. Адзін зь беларускіх пілётаў, вайсковы пэнсіянэр зь Бярозы, нядаўна загінуў ва Ўгандзе — разьбіўся разам з самалётам. Ён пілятаваў адрамантаваны “МіГ-21” і зрабіў трагічную памылку. Гэты няшчасны выпадак не адбіўся на жаданьні іншых ехаць на заробкі ў Афрыку, не адаб’ецца і інцыдэнт у Кот д’Івуары, перакананыя беларускія адстаўнікі:

(Адстаўны афіцэр: ) “Тут вайсковаму пэнсіянэру няма дзе ўладкавацца. Дык гэта лічыцца выгадным з-за нашай галечы”.

Гл. таксама • Ці абстрэльвалі беларускія наёмнікі ў Кот-д’Івуару францускіх міратворцаў?
XS
SM
MD
LG