Лінкі ўнівэрсальнага доступу

Гарадзенскі журналіст Павал Мажэйка выйшаў на свабоду і спыніў галадоўку


Ганна Соусь, Менск Гарадзенскі журналіст Павал Мажэйка завяршыў галадоўку пратэсту. Сёньня скончыўся тэрмін яго адміністратыўнага арышту ў спэцпрыёмніку Кастрычніцкага РАУС Горадні, куды ён трапіў у адпаведнасьці з рашэньнем суду Ленінскага раёну Горадні за ўдзел у несанкцыянаваным шэсьці 4 кастрычніка. З Паўлам Мажэйкам пагутарыла нашая карэспандэнтка.

Старшыня гарадзенскай філіі Беларускай асацыяцыі журналістаў Павал Мажэйка кажа, што адчувае сябе больш-менш нармальна пасьля сямідзённай галадоўкі.

(Мажэйка: ) “Гэта мая першая галадоўка ў жыцьці, такая галадоўка пратэсту, сур’ёзная. На дзіва, адчуваю сябе вельмі добра, і фізычна, і духоўна. Я карыстаўся парадамі мэдыкаў, піў шмат вады, можа да 4 літраў вады ў дзень. Але парады мэдыкаў – гэта толькі невялікі працэнт пасьпяховай галадоўкі, а найважнейшае – гэта вера ў тое, што галадаеш дзеля сумленнай, прыстойнай справы”.

Павал Мажэйка абвясьціў галадоўку 1 лістапада на знак пратэсту супраць рашэньня судзьдзі Ленінскага раёну Горадні Вікторыі Кулакоўскай, якая прызначыла яму сем сутак адміністратыўнага арышту за ўдзел у несанкцыянаваным шэсьці 4 кастрычніка. Тады Павал Мажэйка разам са сваімі калегамі-журналістамі выказваў пратэст супраць прысуду рэдактару гарадзенскай газэты "Біржа інфармацыі" Алене Раўбецкай, якую суд Ленінскага раёна прызнаў вінаватай у паклёпе на Аляксандра Лукашэнку і прысудзіў да вялікага штрафу.

Я запыталася ў Паўла Мажэйкі, што ён лічыць асноўным вынікам сваёй галадоўкі пратэсту.

(Мажэйка: ) “Рэакцыя ў самой Беларусі. Як мне потым расказалі міліцыянты пра дзясяткі тэлефанаваньняў абсалютна розных людзей, нават вэтэранаў, як мне распавядалі. Плюс міжнародная рэакцыя. Мне здаецца, што гэта й ёсьць асноўны вынік, што чарговы раз была зьвернутая ўвага на сытуацыю з правамі чалавека, са свабодай слова ў сьвеце і ў самой Беларусі”.

Павал Мажэйка кажа, што ўмовы ў спэцпрыёмніку Кастрычніцкага РАУС Горадні былі проста жахлівымі.

(Мажэйка: ) “Уявіце сабе камэру 3 на 3 мэтры, дзе ўсе сьпяць на падлозе. Страшэнная сьпякота, таму што ў той дзень, калі мяне асудзілі, там уключылі ацяпленьне. У гэтай камэры ёсьць два акенцы, але з боку вуліцы яны забітыя такой бляхай. Фактычна дыхаць няма чым. Нас было 6 чалавек. І ўсе акрамя мяне палілі. Выводзілі раз на дзень а 6 раніцы памыць твар. Гігіенічных умоваў не было абсалютна ніякіх. Чытаць было немагчыма, бо былі толькі дзьве закратаваныя лямпачкі. Цемра”.

Распавёў кіраўнік Гарадзенскай філіі Беларускай Асацыяцыі журналістаў Павал Мажэйка.
XS
SM
MD
LG