Лінкі ўнівэрсальнага доступу

21 лістапада ва Ўкраіне пройдзе другі тур прэзыдэнцкіх выбараў


Валер Каліноўскі, Кіеў Ва Ўкраіне падводзяць канчатковыя вынікі нядзельных выбараў прэзыдэнта. Ужо вядома, што 21 лістапада будзе другі тур галасаваньня, у якім возьмуць удзел кандыдат ад улады прэм’ер Віктар Януковіч і лідэр апазыцыйнай кааліцыі “Сіла народа” Віктар Юшчанка.

Даволі важнае пытаньне – калі будуць абвешчаныя канчатковыя вынікі галасаваньня, бо з моманту абвяшчэньня гэтых вынікаў зноў дазваляецца агітацыя за кандыдатаў, якія выйшлі ў другі тур. Закон дае на гэта 10 дзён, і ЦВК фармальна мае права адцягнуць агалошваньне канчатковых лічбаў, таму што і сам ход падліку галасоў быў доўгатрывалым – учора ў ЦВК пасьпелі пералічыць толькі 94 адсоткі пратаколаў галасаваньня.

Калі для Януковіча малаістотна, калі будзе абвешчаны вынік і зноў пачнецца агітацыя, бо большасьць дзяржаўных і так званых алігархічных СМІ пра яго і так шмат паведамляюць як пра дзейнага прэм’ера, то Юшчанка можа страціць дадатковыя магчымасьці паправіць праз агітацыю адносіны да сябе на ўсходзе й поўдні краіны.

Што робяць асноўныя канкурэнты на выбарах прэзыдэнта Ўкраіны Віктар Юшчанка і Віктар Януковіч для перамогі ў другім туры ўжо цяпер? Перш за ўсё, зараз ідзе барацьба Януковіча й Юшчанкі за выбаршчыкаў лідэра сацыялістаў Аляксандра Мароза й лідэра камуністаў Пятра Сіманенкі. Тыя атрымалі на мінулых выбарах адпаведна 5,8% і 5% галасоў выбаршчыкаў Украіны. І іх левы электарат можа стаць сапраўды рашаючым у другім туры. Таму Віктар Януковіч ужо заявіў, што гатовы аб’яднаць зь Сіманенкам і Марозам свае палітычныя намаганьні, перш за усё ў справе палітычнай рэформы ў дзяржаве.

Кіраўнік перадвыбарчага штаба кампаніі Віктара Юшчанкі Аляксандр Зінчанка таксама зазначыў, што цягам аднаго-двух дзён будзе дамоўлена аб супрацоўніцтве з кіраўніцтвам СПУ і КПУ, паколькі яны, як апазыцыйныя партыі, і раней супрацоўнічалі зь “Сілай народа” падчас выбарчай кампаніі ды разам цярпелі ад ціску ўладаў.

Тут вельмі важна, што ж думаюць лідэры саміх гэтых партыяў. Пакуль што публічна выказаўся толькі лідэр СПУ Аляксандр Мароз: ён заявіў, што ягоная партыя падтрымае менавіта Віктара Юшчанку, а не праўладнага кандыдата Януковіча. А вось лідэр КПУ Пятро Сіманенка пакуль маўчыць: ня выключана, што ён публічна нікога ня будзе падтрымліваць. Але ягоны электарат, хутчэй за ўсё, пяройдзе да прарасейскага кандыдата Януковіча.

Зусім нечакана прэм’ер Януковіч заявіў, што гатовы да канструктыўнага дыялёгу й са сваім канкурэнтам Юшчанкам з мэтай рэалізацыі важных для народа ягоных праграмных палажэньняў. Рэакцыі на гэтую прапанову Юшчанкі няма: раней ён рашуча адмаўляўся ад супрацоўніцтва з “крымінальна-алігархічным рэжымам”, як называюць у кааліцыі Юшчанкі дзейную уладу.

Якія дадатковыя козыры падрыхтавалі Януковіч і Юшчанка перад другім турам? Канкрэтныя козыры – перш за ўсё ў Януковіча: у выглядзе чарговых сацыяльных праграмаў, кампэнсацыі ўкладаў і гэтак далей. Акрамя таго, ён імкнецца вельмі хутка рэалізаваць свае ранейшыя пляны ўвядзеньня дзяржаўнага статуса для расейскай мовы ва Ўкраіне і падвойнага грамадзянства з Расеяй.

А Віктар Юшчанка ўжо сёньня зьбіраецца ў Вярхоўнай Радзе ініцыяваць разгляд пытаньня пра парушэньні і фальсыфікацыі падчас першага туру галасаваньня. Юшчанка ставіць не на козыры, а на насельніцтва, незадаволенае ўладай: празь некалькі дзён ён зьбіраецца выступіць з палітычным зваротам да нацыі. Штаб апазыцыйнага блёку “Сіла народа” абвясьціў новую мабілізацыйную кампанію.

Кіраўнікі выбарчых штабоў абодвух кандыдатаў кажуць пра сваю перакананасьць у перамозе падчас другога туру галасаваньня 21 лістапада.
XS
SM
MD
LG