Лінкі ўнівэрсальнага доступу

Міністар унутраных справаў Польшчы – мы ня можам супрацоўнічаць зь беларускай міліцыяй, якая зьбівае дэманстрантаў


Альгерд Невяроўскі, Менск Міністар унутраных справаў і адміністрацыі Польшчы Рышард Каліш загадаў прыпыніць дзеяньне падпісанага 12 дзён таму пагадненьня паміж польскай Вышэйшай школай паліцыі й Акадэміяй МУС Беларусі. Паводле міністра Каліша, такое супрацоўніцтва немагчымае ў той час, калі беларуская міліцыя зьбівае дэманстрантаў, што змагаюццца за дэмакратычныя свабоды ў Беларусі. Беларускі бок пакуль гэтага рашэньня не камэнтуе і чакае афіцыйных дакумэнтаў у гэтай справе з Польшчы.

Пагадненьне аб супрацоўніцтве і абмене досьведам паміж Вышэйшай школай паліцыі ў Шчытне і Акадэміяй МУС Беларусі была падпісанае ў Польшчы 13 кастрычніка. Зь беларускага боку гэтую дамову падпісаў намесьнік начальніка па выхаваўчай працы і кадравым забесьпячэньні Акадэміі МУС Беларусі Сяргей Чыгрынаў, з польскага — рэктар Вышэйшай школы паліцыі Вэслаў Манджыёўскі.

Паводле прэсавай сакратаркі Вышэйшай школы паліцыі Сыльвіі Нарэнбскай, дамова, падпісаньне якой рыхтавалася больш за год, прадугледжвала абмен курсантамі паміж дзьвюма вучэльнямі й досьведам навучаньня будучых афіцэраў органаў унутраных справаў. Але 22 кастрычніка кіраўнік польскага Міністэрства ўнутраных справаў і адміністрацыі Рышард Каліш выдаў загад аб прыпыненьні выкананьня гэтага пагадненьня. Вось як ён патлумачыў сваё рашэньне:

(Каліш: ) “Ня можа быць так, што польская Вышэйшая школа паліцыі ў Шчытне падпісвае дамову са школай міліцыі Міністэрства ўнутраных справаў Беларусі ў той час, як беларуская міліцыя зьбівае дэманстрантаў, якія змагаюцца за дэмакратычныя свабоды”.

У Акадэміі Міністэрства ўнутраных справаў Беларусі ніякіх афіцыйных дакумэнтаў з Польшчы ў справе прыпыненьня дзейнасьці пагадненьня яшчэ не атрымлівалі. Гаворыць намесьнік начальніка міліцэйскай Акадэміі Сяргей Чыгрынаў:

(Чыгрынаў: ) “Мы нічога ня ведаем, ніякіх афіцыйных тлумачэньняў з польскага боку не было. Давайце дачакаемся афіцыйнай рэакцыі, якога-небудзь дакумэнта, які павінны яны даслаць. А потым будзем рабіць свае заўвагі”.

Як паведамляе газэта “Zycie Warszawy”, за знаходжаньне беларускіх міліцыянтаў у школе паліцыі павінен быў плаціць польскі бок. Паводле дэпутата Сэйму Польшчы ад партыі “Права і справядлівасьць” Пятра Кшывіцкага, падпісаўшы гэтае пагадненьне паліцыя дапусьціла вялікую памылку і цяпер яе кіраўніцтва павінна патлумачыць чаму гэта здарылася.

У Міністэрстве ўнутраных справаў Польшчы пакуль не гавораць, пасьля выкананьня беларускім бокам якіх умоваў дзеяньне пагадненьня можа быць адноўленае.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG