Лінкі ўнівэрсальнага доступу

У Віцебску невядомыя абрабавалі кватэру старшыні гарадзкой арганізацыі АГП


Браніслава Станкевіч, Віцебск Старшыня віцебскай гарадзкой арганізацыі АГП Алена Залеская не выключае палітычнае матывацыі гэтага злачынства, бо зь ейнай кватэры зьніклі кампутар і факс, якія на перадвыбарчы пэрыяд было вырашана перанесьці сюды з партыйнага офісу.

Злачынства адбылося, калі спадарыні Залескай не было дома. Рабаўнікі ўзьняліся на другі па вадасьцёкавай трубе, выбілі шыбу й трапілі ў кватэру.

Паводле вэрсіі міліцыянтаў з Кастрычніцкага РАУС, злачынцы працавалі ў пальчатках, не пакінулі адбіткаў пальцаў, і таму знайсьці іх будзе досыць цяжка.

Дарэчы, супрацоўнікі міліцыя пазналі Алену Залескую, згадаўшы ейную актыўную назіральніцкую дзейнасьць у часе мінулых выбараў. І параілі згадаць, хто зь ейных знаёмых ведаў пра наяўнасьць у кватэры кампутарнай тэхнікі.

Спадарыня Залеская аднак пэўная, што ейныя аднапартыйцы ня маюць дачыненьня да акту рабаўніцтва, і яна не выключае пэўнага палітычнага падтэксту ў гэтым здарэньні: цяпер гарадзкая арганізацыя АГП засталася без тэхнічных сродкаў і ня можа дзейнічаць гэтаксама актыўна, як раней.

Схіляе да пэўных роздумаў таксама й тое, што невядомыя злачынцы не шукалі ў кватэры спадарыні Залескай грошы або каштоўную біжутэрыю. Адзінае, на што яны паквапіліся – гэта кампутар з інфармацыяй пра дзейнасьць АГП і... банка Nescafe.
XS
SM
MD
LG