Лінкі ўнівэрсальнага доступу

Пачаўся судовы разгляд пазову Валера Фралова да газэты “Обозреватель”


Ганна Соусь, Менск Суд Маскоўскага раёну распачаў разгляд двух пазоваў аб абароне гонару й годнасьці — генэрала Валера Фралова да газэты “Обозреватель” і сустрэчнага пазову журналісткі газэты Ганны Мураўскай да спадара Фралова. Судовае разьбіральніцтва зьвязанае зь леташняй публікацыяй у “Обозревателе” артыкула з назовам “Дэпутаты Касьцян, Навасяд, Фралоў — асабовыя антысэміты?”

Генэрал Валер Фралоў патрабуе ад газэты “Обозреватель” 100 мільёнаў рублёў за тое, што ў публікацыі яго назвалі антысэмітам. Размова ідзе пра інтэрвію журналісткі Ганны Мураўскай са старшынём Беларускага саюзу габрэйскіх арганізацыяў і суполак Леанідам Левіным. Спадар Левін неаднаразова сьцьвярджаў, што ён ніколі не называў генэрала Фралова антысэмітам.

(Левін: ) “Гэта фальсыфікацыя, гэта не мае словы. Яны праслухалі стужку, і калі спатрэбілася адна хвіліна, каб згадаць другое прозьвішча, яны ўставілі два імя. А я ўжо ўспомніў і сказаў: “так, так”, і гэтыя “так, так” яны зрабілі асновай”.

А генэрал Фралоў лічыць, што распаўсюджаныя пра яго непраўдзівыя зьвесткі сапсавалі яму рэпутацыю.

(Фралоў: ) “Я вельмі паважаю габрэяў, у мяне сябры ёсьць габрэі. А цяпер я антысэміт? У чым выявіўся мой антысэмітызм?”

Са свайго боку карэспандэнтка “Обозревателя” Ганна Мураўская лічыць, што яна дакладна перадала словы Леаніда Левіна, і што ў сваім пазове спадар Фралоў абразіў яе асабіста і пашкодзіў яе прафэсійнай рэпутацыі. Яна патрабуе ад Фралова 15 мільёнаў рублёў кампэнсацыі. Гаворыць прадстаўніца рэдакцыі “Обозреватель” адвакатка Алена Чарэй:

(Чарэй: ) “Пазоў Фралова ёсьць публічным распаўсюджваньнем зьвестак, якія абражаюць дзелавую рэпутацыю газэты “Оброзреватель” і карэспандэнткі Ганны Мураўскай. Я мяркую, што суд вынясе справядлівы вэрдыкт”.

Судовае рашэньне ў гэтай справе будзе вынесенае заўтра. Згаданы артыкул у “Обозревателе” летась стаў падставай для публікацыі ў “Народнай волі” артыкула “Как “Обозреватель” Сергея Атрощенко по-бандитски обошелся с Леонидом Левиным”. Тады таварыства “Альянс-мэдыя”, якім валодае Сяргей Атрошчанка, запатрабавала праз суд 50 мільёнаў рублёў кампэнсацыі з “Народнай волі” за маральныя страты. Сёлета ў лютым суд Ленінскага раёну Менску часткова задаволіў пазоў і прызнаў назву артыкула, а таксама некалькі фразаў зь яго абразай для дзелавой рэпутацыі “Обозревателя”. Пры гэтым патрабаваньня аб грашовай кампэнсацыі суд не задаволіў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG