Лінкі ўнівэрсальнага доступу

Галоўнага рэдактара газэты “Биржа информации” судзяць за публікацыю пра рэфэрэндум


Сяргей Астраўцоў, Горадня У Ленінскім раённым судзе Горадні сёньня разглядалі адміністрацыйную справу супраць галоўнай рэдактаркі газэты “Биржа Информации” Алены Раўбецкай. Яна – аўтарка публікацыі, прысьвечанай рэфэрэндуму, пад назвай “Здрада імем народу”.

Ленінская раённая пракуратура палічыла, што ў публікацыі, зыходзячы з артыкулу 172 адміністрацыйнага кодэксу, парушаны патрабаваньні артыкулу 5 закону аб друку.

У гэтым артыкуле гаворыцца аб недапушчальнасьці выкарыстаньня сродкаў масавай інфармацыі для распаўсюджваньня зьвестак, якія зьневажаюць гонар і годнасьць прэзыдэнта Рэспублікі Беларусь.

За гэта прадугледжана пакараньне — штраф ад 50 да 100 базавых велічыняў.

Судзьдзя Натальля Козел сказала, што справу будзе разглядаць у кабінэце, хаця адвакат Аляксандар Бірылаў прапанаваў забясьпечыць большую адкрытасьць разгляду. Ён таксама прапанаваў правесьці лінгвістычную экспэртызу публікацыі, але судзьдзя адхіліла гэтае хадайніцтва.

У судзе заслухалі саму Алену Раўбецкую і, у якасьці сьведкаў, супрацоўніцу “Биржы Информации” Натальлю Макушыну і Міколу Маркевіча — галоўнага рэдактара газэты “День”.

Выступіў таксама прадстаўнік Раўбецкай Міхаіл Пастухоў — кіраўнік Цэнтру прававой абароны БАЖ. Яны гаварылі пра тое, што ў публікацыі няма іншых зьвестак, апроч усім вядомага паведамленьня пра рэфэрэндум. Усё астатняе — меркаваньне журналіста, які мае права яго выказваць.

(Пастухоў: ) “Прычынай і віноўнікам усяго гэтага, як ні дзіўна, мне здаецца, паслужыў сам кіраўнік дзяржавы і ягонае рашэньне, якое, на мой погляд, зьяўляецца неканстытуцыйным — аб прызначэньні канстытуцыйнага рэфэрэндуму аб працягненьні тэрміну паўнамоцтваў”.

Алена Раўбецкая выказала ў публікацыі меркаваньне, што ня можа быць моцных і справядлівых законаў, упэўненасьці ў заўтрашнім дні, калі канстытуцыю будуць зьмяняць па тры разы за дзесяць гадоў. Судовае рашэньне будзе гатова заўтра, сказала судзьдзя Натальля Козел.
XS
SM
MD
LG