Лінкі ўнівэрсальнага доступу

У Беларусі пачаліся найбуйнейшыя за апошнія 25 гадоў вайсковыя манэўры


Алег Грузьдзіловіч, Менск 27 верасьня ў Беларусі пачаліся найбуйнейшыя за апошнія 25 гадоў манэўры пад назвай “Шчыт Айчыны 2004”. Яны будуць праходзіць на шэрагу палігонаў у розных рэгіёнах краіны.

Палігоны пад Баранавічамі, у Гарадзенскай вобласьці й пад Барысавам ужо падрыхтаваныя, каб адначасова прыняць больш за 8 тысяч вайскоўцаў — удзельнікаў манэўраў “Шчыт Айчыны 2004”. А яшчэ будуць задзейнічаныя мясцовая міліцыя, часткі ўнутраных войскаў, памежнікі й супрацоўнікі КГБ. У генэральным штабе беларускай арміі кажуць, што сцэнар і маштабы манэўраў зацьвердзіў Аляксандар Лукашэшка, ён жа сфармуляваў і асноўную іх мэту.

(Ціханоўскі: ) “Галоўная мэта манэўраў — ацаніць дастатковасьць мераў абароны дзяржавы, праверыць эфэктыўнасьць сыстэмы ўсёй бясьпекі нашай рэспублікі. Нашыя мэты адкрытыя. Чарговы раз мы запрашаем на манэўры вайсковых аташэ замежных краінаў, назіральнікаў, усе сродкі масавай інфармацыі”, — казаў намесьнік начальніка генэральнага штабу Пётар Ціханоўскі.

2 кастрычніка Аляксандар Лукашэнка прыедзе на палігон пад Барысавам, каб назіраць за заключнай фазай манэўраў. Скончацца яны, як звычайна, урачыстым парадам.

Я папрасіў прэсавага сакратара прэзыдэнта Натальлю Пяткевіч ўключыць мяне ў групу журналістаў, якія будуць асьвятляць гэтую падзею, але мне было адказана, што гэта немагчыма.

Афіцыйна нічога не паведамляецца пра тое, колькі будуць каштаваць беларускаму бюджэту буйнамаштабныя манэўры “Шчыт Айчыны 2004”.
XS
SM
MD
LG