Лінкі ўнівэрсальнага доступу

Апытаньне тыдня ў Магілёве: “Беларусь – гэта краіна, якая можа жыць лепей, чым цяпер”


Марыя Ўсьціновіч, Магілёў “Што можа зьмяніцца, калі краіну ўзначаліць іншы палітык, а не Аляксандар Лукашэнка?” Сёньня на гэтае пытаньне адказваюць жыхары горада Магілёва.

(Спадарыня: ) “Я лічу, што павінны адбыцца нейкія зьмены. І мы ўсе, канечне, спадзяемся на самае лепшае”.

(Спадар: ) “У гэтай краіне, па-мойму, усё ня так. І з нашым прэзыдэнтам. Мне падаецца, што было б лепей і ў палітычным сэнсе, і ў эканамічным. Толькі гэтага ня будзе – гэта бачна ўжо зараз, што гэтага ня будзе”.

(Спадар: ) “Памылак шмат у цяперашняй улады. І стаўленьне людзей, і дэмакратыя, і эканоміка, усё…”

(Спадар: ) “Нічога да лепшага, напэўна, ня зьменіцца. Я ня бачу вартых, хто б мог замяніць нашага прэзыдэнта”.

(Спадарыня: ) “А з прыходам новага будуць разбурэньні таго, што дасягнута на гэтым роўні, і пачнецца зноў хаос”.

(Спадар: ) “Іншага палітыка, напэўна, няма ў цяперашні час. Не несьмяротны, але пры ім жыцьцё стала лепшым. Трэба ведаць спачатку, хто прыйдзе, а потым гаварыць”.

(Спадарыня: ) “Ня веру нікому! Я мяркую, што нічога, ня ведаю…”

(Спадар: ) “Павінна ж зьмяніцца да лепшага, напэўна. Трэба падняць узровень жыцьця, заробак, усё такое…”

(Спадарыня: ) “Я лічу, што ў першую чаргу павінен палепшыцца дабрабыт народу. Каб больш увагі надавалі бясплатнай мэдыцыне”.

(Спадар: ) “Я лічу, што ў першую чаргу павінна зьмяніцца эканамічная сытуацыя, стаўленьне да дробнага бізнэсу, а таксама галоснасьць”.

(Спадарыня: ) “Свабода слова – гэта самой сабой, гэта павінна быць. Зараз у нас усюды цэнзура, я так разумею. Нас правяраюць літаральна ўсюды і ва ўсім. Таму свабоды слова, я лічу, няма”.

(Спадар: ) “Ой, ну што я магу адказаць? Я дзяржаўны службовец, у палітыку ня маю права ўмешвацца”.

(Спадар: ) “Можа, дэмакратыі болей будзе. Ня ведаю, я супраць Лукашэнкі, але, па-мойму, акрамя яго, няма каму кіраваць”.

(Спадарыня: ) “Я мяркую, што калі прыйдзе палітык, які хоча нешта зьмяніць да лепшага, і калі яму ня будуць перашкаджаць, то будзе лепей. Таму што іншы чалавек – іншыя погляды, будуць іншыя накірункі ў палітыцы. Я мяркую, што Беларусь – гэта тая краіна, якая можа жыць лепей, чым цяпер”.

(Спадарыня: ) “Я мяркую, што ў наш час усё можна зьмяніць. І прыйдзе гэты час. Канечне, будуць цяжкасьці вялікія, але ўсё будзе выдатна ў нас”.
XS
SM
MD
LG