Лінкі ўнівэрсальнага доступу

Многія беларускія прадпрымальнікі ня бачаць магчымасьці для разьвіцьця свайго бізнэсу, калі Аляксандар Лукашэнка застанецца кіраваць краінай


Юлія Шарова, Менск За час ягонага знаходжаньня пры ўладзе колькасьць прыватных прадпрыемстваў скарацілася ў некалькі разоў. Бізнэсоўцы мяркуюць, што надалей карціна будзе яшчэ горшай.

Гандляры зь менскіх рынкаў адзначаюць: апошнія месяцы ў іхных стасунках з уладай назіралася зацішша — не было ніякіх карных захадаў. Адзін з маіх суразмоўцаў лічыць, што гэта адбылося з прычыны набліжэньня рэфэрэндуму.

(Прадпрымальнік: ) “Цяпер, у дадзены момант гэтыя карныя захады заціхлі. Калі так застанецца, то будзе нармальна”.

(Гандляр: ) “Я лічу, што трэці тэрмін можа даваць толькі пракурор. Ці зьменіцца палітыка ў адносінах да прадпрымальнікаў? Палітыка й бяз гэтага дастаткова жорсткая. Той самы суседні паляк плаціць падатак усяго 50 эўра ў месяц, а я чамусьці павінен плаціць 112”.

(Прадпрымальніца: ) “Кепска і ў бізнэсе, і наогул ва ўсіх адносінах, калі будзе працяг таго, што ёсьць цяпер”.

Старшыня Беларускага саюзу прадпрымальнікаў Аляксандар Патупа лічыць, што ў тым выпадку, калі Лукашэнка застанецца на трэці тэрмін, беларускаму бізнэсу ўжо ня варта чакаць ніякай лібэралізацыі, абяцанай перад выбарамі 2001 году.

(Патупа: ) “Краіна будзе выпадаць з эўрапейскай прасторы. Уся Эўропа ідзе шляхам пашырэньня колькасьці прыватных бізнэсаў, а нашая краіна нейкія арыгінальныя крокі робіць”.

Пра будучыя складанасьці ва ўзаемадачыненьнях беларускага бізнэсу з Эўропай гаворыць і замежны прадпрымальнік Марсэль, які займаецца ў Беларусі рамонтам і продажам бытавой тэхнікі. На ягоную думку, станоўчых пераменаў, калі Лукашэнка застанецца пры ўладзе, чакаць ня варта.

(Марсэль: ) “За дзесяць год у лепшы бок нічога не зьмянілася. Які тады ёсьць шанец, што ў наступныя пяць нешта зьменіцца? Гэта яшчэ больш адпужае інвэстараў, якія могуць сюды прыйсьці”.

Сам Марсэль гаворыць, што цягам апошніх год ягоны бізнэс зусім не расьце ў прыбытках, хоць прадпрымальнік спрабуе неяк пашырыцца. Ён не выключае і будучых стратаў. Калі гэта адбудзецца, ён адразу ж зьедзе дадому ў Эўропу.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG