Лінкі ўнівэрсальнага доступу

Улёткі “Пяць крокаў да лепшага жыцьця” сталіся прычынаю перасьледу актывіста АГП у Жлобінскім раённым судзе


Казімер Яноўскі, Жлобін У Жлобінскім раённым судзе судзілі намесьніка старшыні Гомельскай абласной арганізацыі Аб’яднанай грамадзянскай партыі Ўладзімера Кацору за ўлёткі “Пяць крокаў да лепшага жыцьця” і газэту “Время”. Як паведамляла наша радыё, 12 жніўня спадар Кацора перавозіў на ўласным легкавіку каля 15 тысяч улётак і звыш тысячы асобнікаў газэты “Время”. Пад выглядам таго, што легкавік знаходзіцца ў вышуку, дзяржааўтаінспэкцыя на пасту блізу Жлобіна спыніла партыйнага актывіста. У райаддзеле міліцыі быў учынены вобшук. Улёткі й газэты, што ляжалі ў багажніку легкавіка, жлобінскія міліцыянты сканфіскавалі, склалі пратакол і накіравалі яго ў мясцовы суд.

Судзьдзя Алена Ярмольчык, якая разглядала складзены міліцыяй адміністрацыйны пратакол, дапытвалася ў спадара Кацоры, адкуль і куды ён вёз 15 тысяч улётак “Пяць крокаў да лепшага жыцьця”? Ці зарэгістраваныя афіцыйна кааліцыя “Пяцёрка плюс” і Аб’яднаная грамадзянская партыя? Ці зьяўляецца газэта “Время” партыйным выданьнем?

Спадар Кацора патлумачыў, што вёз улёткі зь Менску ў Гомель на просьбу знаёмага. Што да газэты “Время”, то паміж АГП і рэдакцыяй ёсьць дамова на распаўсюд гэтага выданьня. Падсудны партыйны актывіст прасіў судзьдзю патлумачыць, што ён парушыў.

Але па сутнасьці на гэтым судовае паседжаньне і скончылася. Судзьдзя Ярмольчык запатрабавала ад спадара Кацоры прадставіць да 14 гадзінаў заўтрашняга дня дакумэнты афіцыйнай рэгістрацыі Аб’яднанай грамадзянскай партыі й міжпартыйнай кааліцыі “Пяцёрка плюс”. Чакаецца, што заўтра і будзе прынята рашэньне.

Адразу пасьля судовага паседжаньня ўладзімер Кацора сказаў нашаму радыё:

(Кацора: ) “Пяць крокаў да лепшага жыцьця” — гэта праграма кааліцыі людзей, грамадзкіх дзеячоў. Яны маглі бы гэтую праграму ажыцьцявіць. І менавіта з гэтай прычыны ўлады не даюць, каб гэтая праграма дайшла да людзей”.

Сёньняшняя справа супраць спадара Кацоры — першая ў Беларусі, калі партыйнага актывіста, як прыватнага грамадзяніна, спрабуюць прыцягнуць да адназнасьці нібыта за дзейнасьць ад імя незарэгістраванай палітычнай партыі ці грамадзкай арганізацыі.
XS
SM
MD
LG