НЭДЖЭФ. Прэм’ер-міністар Іраку Іяд Аляўі сёньня наведаў горад Нэджэф, дзе у выніку жорсткіх баёў паміж войскамі ЗША і прыхільнікамі радыкальнага шыіцкага клірыка цягам апошніх трох дзён загінулі сотні людзей. Пра візіт загадзя не абвяшчалася. Разам з прэм’ерам горад наведалі ірацкія міністры унутраных справаў і юстыцыі і дараднік па пытаньнях нацыянальнай бясьпецы. Іяд Аляўі заклікаў прыхільнікаў Моктады аль-Садры скласьці зброю і пакінуць горад, які лічыцца сьвятым у мусульманаў, і пакінуць сьвятое для шыітаў месца Імам Алі Шрайн, якое цяпер кантралююць ваяўнікі аль-Садра.
Кіраўнік гораду Нэджэф заявіў, што ніякіх перамоваў з ваяўнікамі ня можа адбывацца, паколькі яны стала парушаюць дамовы аб перамір’і і нападаюць на ірацкую паліцыю.
Гэнэральны сакратар ААН Кофі Анан раней прапанаваў дапамогу ААН у перамовах дзеля спыненьня гвалту ў Іраку.
Як найменей 43 чалавекі былі забітыя у Нэджэфе цягам апошніх 24 гадзінаў у баях паміж войскамі ЗША і ваяўнікамі аль-Садра.