Лінкі ўнівэрсальнага доступу

Польскі Сэйм выступае за захаваньне правоў чалавека ў Беларусі


Аляксей Дзікавіцкі, Варшава Камісія ў замежных справах польскага Сэйму ўхваліла рэзалюцыю, у якой выступае супраць парушэньняў палітычных правоў грамадзянаў Беларусі. Пазыцыю камісіі падтрымаў намесьнік міністра замежных справаў Польшчы.

“Нас усё больш непакояць паведамленьні пра ўзмацненьне рэпрэсіяў і абмежаваньняў, скіраваных супраць дэмакратычнай апазыцыі ў Беларусі”, – гаворыцца ў рэзалюцыі, якую сябры Камісіі ў замежных справах Сэйму ухвалілі аднагалосна.

Рэзалюцыя была ўнесеная ў парадак дня працы камісіі пасьля таго, як стала вядома пра намер афіцыйнага Менску зьліквідаваць Беларускую партыю працы.

Аўтар рэзалюцыі, дэпутат Сэйму ад партыі “Закон і справядлівасьць” (Prawo i Sprawiedliwość) Марэк Юрэк упэўнены, што напярэдадні парлямэнцкіх выбараў беларускія ўлады імкнуцца зьліквідаваць усе апазыцыйныя партыі, якія яшчэ ў Беларусі дзейнічаюць, а перасьлед Партыі працы ёсьць толькі пачаткам гэтага працэсу.

(Юрэк: ) “Мы даведаліся, што партыі, якія ўваходзяць у кааліцыю “Пяцёрка плюс”, атрымалі папярэджаньні аб магчымай дэлегалізацыі іхнай дзейнасьці. У такой сытуацыі Польшча ня можа заставацца ў баку, тым больш што гаворка ідзе пра вельмі блізкую нам краіну”.

У рэзалюцыі гаворыцца таксама, што камісія “лічыць неабходным, каб польская дыпляматыя прыкладала ўсе намаганьні ў справе абароны апазыцыйных арганізацыяў і асобных актывістаў, якіх перасьледуюць беларускія ўлады”. Акрамя гэтага, у дакумэнце падкрэсьліваецца, што пытаньні парушэньняў правоў чалавека ў Беларусі павінны больш актыўна ўздымацца ў Эўрапейскім Зьвязе, Радзе Эўропы і АБСЭ.

(Юрэк) “Падставовыя свабоды, якія завуць правамі чалавека гэта частка міжнароднага заканадаўства. Краіна дае абавязацельства, што будзе іх забясьпечваць і павінна гэта рабіць. Таму мы маем поўнае права запытацца ў нашых суседзяў, як у іх выглядае сытуацыя з правамі чалавека. Міністэрства замежных справаў Польшчы ўжо працуе ў гэтым накірунку, а цяпер, пасьля рашэньня камісіі Сэйму, мяркую, будзе зоймецца гэтым яшчэ больш актыўна”, – адзначыў Марэк Юрэк.

Дарэчы ў паседжаньні Камісыі ў замежных справах браў удзел намесьнік міністра замежных справаў Польшчы Ян Трушчыньскі, які цалкам пагадзіўся са зьместам рэзалюцыі.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG